Pune Politics : पुण्यातील राजकारणात मोठी घडामोड; काँग्रेस नेत्याच्या हकालपट्टीची मागणी, भाजपच्या वाटेवर असल्याची होती चर्चा

आबा बागुल यांच्यावर कारवाई झालीच पाहिजे, यावर काँग्रेसच्या बैठकीत पदाधिकाऱ्यांचं एकमत झाल्याची माहिती मिळत आहे. पुण्यात काल (२१ एप्रिल) काँग्रेसची बैठक पार पडली. या बैठकीला पृथ्वीराज  चव्हाण, बाळासाहेब थोरात उपस्थित होते. आबा बागुल यांच्या विरोधात काँग्रेसमध्ये नाराजी असल्याची माहिती मिळत आहे.

पुण्यातून  कसब्याचे आमदार रवींद्र धंगेकर यांना काँग्रेसने लोकसभा निवडणुकीसाठी उमेदवारी जाहीर केली होती. त्यानंतर पक्षातील अंतर्गत वाद उफाळून आला आहे. रवींद्र धगेंकर यांना उमेदवारी जाहीर झाल्यानंतर पुण्याचे माजी महापौर आबा बागुल यांनी उमेदवारीवरून नाराजी बोलून दाखवली होती. मागील काही दिवस त्यांची नाराजी कायम होती.

आबा बागुल यांनी रवींद्र धगेंकर यांना उमेदवारी जाहीर झाल्यानंतर उपमुख्यमंत्री देवेंद्र फडणवीस यांची भेट घेतली होती. त्यानंतर दोन दिवसांत निर्णय जाहीर करणार असल्याचं त्यांनी सांगितलं (Pune Congress) होतं. त्यानंतर त्यांच्याविरोधात कॉंग्रेस कार्यकर्त्यांमध्ये नाराजी दिसून आली आहे. पुण्यातील राजकारणात मोठी घडामोड होताना दिसत आहे. कार्यकर्त्यांनी त्यांची पक्षातुन हकालपट्टीची मागणी केली आहे.