Pune Crime News : गुंड टोळक्याकडून दहशत पसरवत कोयत्याने हल्ला, तिघेजण जखमी

याबाबत नचिकेत संजय जगताप (वय २२, रा. गोऱ्हे बुद्रूक, ता. हवेली) या तरुणाने फिर्याद दिली आहे. पोलिसांनी दिलेल्या माहितीनुसार, गोऱ्हे बुद्रूक येथील दर्वेश चिकन सेंटर समोर रस्त्यावर गुंड टोळक्याने बुधवारी रात्री साडेआठ वाजण्याच्या सुमारास कोयते हातात घेऊन परिसरात दहशत माजवली.

मित्राला मारहाण केल्याच्या संशयावरून गुंड टोळक्याने तिघांना कोयत्याने आणि दगडांनी मारहाण करुन गंभीर दुखापत केली. या टोळक्याने कोयत्याने केलेल्या हल्ल्यात नचिकेत संजय जगताप, ऋषिकेश जगताप आणि नीलेश शहा असे तिघेजण जखमी झाले आहेत. जखमींवर रुग्णालयात उपचार सुरू आहेत.

याबाबत माहिती मिळताच पोलिस अधिकाऱ्यांनी घटनास्थळी भेट दिली. सीसीटीव्हीच्या आधारे आरोपींचा शोध घेण्यात येत असून, तपास पथके रवाना करण्यात आल्याचे हवेलीचे पोलिस निरीक्षक सचिन वांगडे यांनी सांगितले. पुढील तपास सहाय्यक पोलिस निरीक्षक पवार करीत आहेत.