Pune Accident : कात्रजमध्ये भीषण अपघात; ट्रकचे चाक अंगावरून गेल्याने ३ वर्षीय चिमुकल्याचा जागीच मृत्यू, वडील गंभीर जखमी

Pune : भरधाव ट्रकच्या धडकेत तीन वर्षांच्या चिमुकल्याचा मृत्यू झाल्याची घटना कात्रज परिसरात घडली. या अपघातात वडील किरकोळ जखमी झाले असून, भारती विद्यापीठ पोलिस ठाण्यात ट्रकचालकाविरुद्ध गुन्हा दाखल करण्यात आला आहे.

ही घटना २८ फेब्रुवारीला सकाळी साडेआठच्या सुमारास कात्रज येथील मोती ट्रॅव्हल्सच्या माणिक कॉम्प्लेक्सजवळील कार्यालयासमोर घडली. या प्रकरणी भाऊरंग रावसाहेब सोनकांबळे (वय ४५, रा. अंजनीनगर, कात्रज) यांनी तक्रार दिली आहे.

काय घडलं नेमकं?
पोलिसांनी दिलेल्या माहितीनुसार, सोनकांबळे त्यांचा तीन वर्षांचा मुलगा अंश याच्यासोबत दुचाकीवरून घरी जात होते. त्या वेळी त्यांच्या पाठीमागून आलेल्या ट्रकचालकाने वाहन भरधाव, निष्काळजी आणि बेदरकारपणे चालवून सोनकांबळे यांच्या दुचाकीला जोरदार धडक दिली. धडकेनंतर ट्रकचे चाक अंशच्या अंगावरून गेल्याने त्याचा जागीच मृत्यू झाला. या अपघातात वडील किरकोळ जखमी झाले. या प्रकरणी ट्रकचालक इंद्रजित बाबूराव जानते (वय ५०, रा. निलंगा, लातूर) याच्याविरुद्ध गुन्हा दाखल करून, त्याला ताब्यात घेण्यात आले आहे. सहायक पोलिस निरीक्षक स्वप्नील पाटील तपास करीत आहेत.

अपघातांचा हॉटस्पॉट?
कात्रज चौक परिसरात गेल्या आठ दिवसांपूर्वीच अपघातात तरुणीचा मृत्यू झाला होता; तसेच या परिसरात सातत्याने गंभीर अपघात झालेले आहेत. त्यामुळ‌े हा परिसर अपघातांचा हॉट्सपॉट ठरत आहे. मात्र, स्थानिक पोलिस, वाहतूक पोलिसांकडून अपघातांना अटकाव करण्यासाठी कोणतीही ठोस योजना राबविण्यात येत नसल्याचे दिसून येते.