सातारा: प्रवासाचा वेळ होणार कमी! पश्चिम महाराष्ट्र आणि कोकण जोडण्यासाठी तीन नवीन भुयारी मार्ग उभारणार; उपमुख्यमंत्री एकनाथ शिंदे यांची मोठी घोषणा

सातारा: पश्चिम महाराष्ट्र आणि कोकण यांच्यातील दळणवळण अधिक गतिमान, सुटसुटीत आणि सुखकर करण्यासाठी राज्य सरकारकडून एक अत्यंत महत्त्वाकांक्षी पाऊल उचलण्यात आले आहे. मुंबई-पुणे एक्सप्रेसवेवरील 'मिसिंग लिंक'च्या धर्तीवर आता पश्चिम महाराष्ट्राला कोकणाशी जोडण्यासाठी तब्बल तीन नवीन भुयारी मार्ग (टनेल/सबवे) तयार करण्यात येणार असल्याची मोठी घोषणा राज्याचे उपमुख्यमंत्री एकनाथ शिंदे यांनी केली आहे. या महत्त्वाच्या प्रकल्पांमुळे घातांमधील नागमोडी वळणे आणि वाहतूक कोंडीचा त्रास प्रवाशांना सहन करावा लागणार नाही, तसेच पर्यटनालाही मोठी चालना मिळणार आहे.

महाबळेश्वर, कास आणि तापोळा परिसराचा विकास

उपमुख्यमंत्री एकनाथ शिंदे यांनी दिलेल्या माहितीनुसार, या नवीन प्रकल्पांतर्गत महाबळेश्वर, कास पठार आणि तापोळा परिसराला जोडणाऱ्या तीन भुयारी मार्गांची निर्मिती केली जाणार आहे. या भागातील पर्यटन वाढीस लावण्यासाठी आणि पर्यटकांचा प्रवास अधिक वेगवान करण्यासाठी हे भुयारी मार्ग अत्यंत फायदेशीर ठरणार आहेत. सध्या घाटमार्गावरून प्रवास करताना होणारा वेळ आणि प्रवाशांना होणारा त्रास यामुळे मोठ्या अडचणी निर्माण होतात. या भुयारी मार्गांमुळे अंतर कमी होऊन प्रवास अत्यंत सुरक्षित आणि जलद होणार आहे.

तसेच, महाबळेश्वर येथील वाढती वाहतूक कोंडी आणि वाहनतळाची (पार्किंग) समस्या सोडवण्यासाठी बस स्थानक परिसरात लवकरच एक अत्याधुनिक बहुमजली वाहनतळ उभारण्यात येणार असून, त्यासाठीची जागा संबंधित स्थानिक प्रशासनाकडे हस्तांतरित करण्यात येणार असल्याचेही त्यांनी स्पष्ट केले. या उपाययोजनांमुळे कोकण आणि पश्चिम महाराष्ट्रातील पर्यटन क्षेत्राला मोठी भरभराट मिळेल आणि प्रवाशांचा प्रवास अधिक सुखकर होईल.