मोठ्या वयाच्या महिला आवडतात..; 66 वर्षीय अभिनेत्रीचं दुसरं लग्न, पती म्हणाला “मित्रांची आई..”

प्रसिद्ध पाकिस्तानी अभिनेत्री बुशरा अंसारी यांनी वयाच्या 66 व्या वर्षी दुसरं लग्न करून सर्वांनाच चकीत केलं. बुशरा आता 69 वर्षांच्या आहेत. त्यांनी पाकिस्तानच्या बऱ्याच लोकप्रिय मालिकांमध्ये सासू किंवा आईच्या भूमिका साकारल्या आहेत. बुशरा या त्यांच्या दमदार अभिनयासाठी ओळखल्या जातात. परंतु वयाच्या 66 व्या वर्षी लग्न करून त्या त्यांच्या खासगी आयुष्यामुळे चर्चेत आल्या होत्या. बुशरा यांचं पहिलं लग्न 1978 मध्ये झालं होतं. परंतु लग्नाच्या 36 वर्षांनंतर त्यांनी 2014 मध्ये पतीला घटस्फोट दिला. घटस्फोटानंतर वयाच्या 66 व्या वर्षी त्यांनी इकबाल हुसैन यांच्याशी दुसरं लग्न केलं. या वयात लग्न केल्यामुळे पाकिस्तानी मीडियामध्ये त्याची चांगलीच चर्चा होती.

बुशरा यांचे पती इकबाल हुसैनसुद्धा अभिनेते आहेत. तेसुद्धा घटस्फोटीत आहेत. नुकत्याच दिलेल्या एका मुलाखतीत इकबाल यांनी त्यांच्यापेक्षा वयाने मोठ्या अभिनेत्रीशी का लग्न केलं, यामागचं कारण सांगितलं आहे. इकबाल हुसैन यांनी पाकिस्तानच्या रमजान स्पेशल टॉक शोमध्ये हजेरी लावली होती. त्यात ते म्हणाले, “बुशराने मला एकदा म्हटलं होतं की लग्न करून टाक, कधीपर्यंत एकटाच राहशील. तेव्हा मी तिला म्हणालो की, तू सुद्धा एकटीच आहेस, तूच कर माझ्याशी लग्न. मला आयुष्यात कधीच माझ्या वयाच्या मुली आवडल्या नाहीत. मला नेहमीच माझ्यापेक्षा वयाने मोठ्या महिलाच आवडल्या आहेत. मी जेव्हा माझ्या मित्रांच्या घरी जायचो, तेव्हा त्यांना म्हणायचो की, तुमच्या बहिणींना बाजूला करा, पण आईंना माझ्यापासून धोका आहे. अर्थात मी मस्करी करतोय.”

इकबाल यांचा हा व्हिडीओ व्हायरल होताच त्यावरून अनेकांनी ट्रोल केलंय. आई किंवा बहिणींबद्दल अशा प्रकारची टिप्पणी केल्याप्रकरणी नेटकऱ्यांनी जोरदार टीका केली आहे. बुशरा अन्सारी यांना जेव्हा दुसऱ्या लग्नाबद्दल विचारलं गेलं, तेव्हा त्या म्हणाल्या, “माझ्या मनात तर दुसऱ्या लग्नाचा काहीच विचार नव्हता. घटस्फोटानंतर मी माझ्या आयुष्यात खुश होती. इकबालच्या घटस्फोटालाही 6 वर्षे झाली होती. तो एकटाच राहत होता. कामाच्या निमित्ताने आमच्यात संवाद सुरू झाला आणि मग मैत्री झाली. तो त्याच्या वयापेक्षाही अधिक समजूतदार आहे. त्यामुळे मी त्याच्याशी लग्नाचा निर्णय घेतला.”