पुणे: वाघोलीत हुंड्यासाठी छळ; २१ वर्षीय विवाहितेची गळफास घेऊन आत्महत्या, पती आणि सासूवर गुन्हा दाखल

पुणे (वाघोली): पुण्यातील वाघोली परिसरातून एक हृदयद्रावक घटना समोर आली आहे. हुंड्याची मागणी आणि कारचे हप्ते भरण्यासाठी माहेरून पैसे आणण्याच्या तगाद्याला कंटाळून २१ वर्षीय विवाहिता प्रतीक्षा जयसिंग कदम हिने गळफास घेऊन आपले आयुष्य संपवले आहे. विशेष म्हणजे, प्रतीक्षा ही लहानपणापासून ज्या आत्याकडे लहानाची मोठी झाली, त्याच आत्याच्या मुलाने आणि आत्याने तिचा छळ केल्याचा आरोप आहे.

नेमके प्रकरण काय?
प्रतीक्षाचे वडील बन्सी खामकर (रा. केज, जि. बीड) हे ऊसतोड कामगार आहेत. कामाच्या व्यापा मुळे त्यांनी प्रतीक्षाला लहानपणीच वाघोली येथील तिची आत्या हौसाबाई कदम यांच्याकडे राहायला पाठवले होते. तिथेच ती मोठी झाली आणि तिचे शिक्षणही झाले. ९ मे २०२३ रोजी प्रतीक्षाचा विवाह आत्याचा मुलगा जयसिंग कदम याच्याशी थाटामाटात लावून देण्यात आला.

छळाची सुरुवात:
लग्नानंतर काही महिन्यांतच सासरच्या मंडळींनी सोन्याच्या अंगठीची मागणी सुरू केली. २०२४ मध्ये प्रतीक्षाला मुलगी झाली, तेव्हाही सासरच्यांनी नाराजी व्यक्त केली आणि बाळंतपणाचा खर्च देण्यास नकार दिला. पती जयसिंग हा वारंवार दारू पिऊन येऊन तिला मारहाण करत असे.

कारचे हप्ते आणि छळ:
जानेवारी २०२६ मध्ये जयसिंगने एक कार खरेदी केली. या कारचे हप्ते भरण्यासाठी प्रतीक्षाने माहेरून पैसे आणावेत, यासाठी तिचा शारीरिक आणि मानसिक छळ वाढला. १६ एप्रिल रोजी तिने गावी यात्रेला येण्याची इच्छा व्यक्त केली असता, पतीने तिला फोनवरच धमकावले. १७ एप्रिल रोजी फोन सुरू असतानाच जयसिंगने तिला वडिलांसमोर मारहाण केली, ज्याचा आवाज फोनवरून वडिलांना ऐकू आला. त्यानंतर काही वेळातच प्रतीक्षाने राहत्या घरी गळफास घेतला.

पोलीस कारवाई:
प्रतीक्षाला तातडीने ससून रुग्णालयात नेण्यात आले, मात्र डॉक्टरांनी तिला मृत घोषित केले. या प्रकरणी प्रतीक्षाचे वडील बन्सी खामकर यांच्या फिर्यादीवरून वाघोली पोलिसांनी पती जयसिंग मधुकर कदम आणि सासू हौसाबाई मधुकर कदम यांच्याविरोधात हुंडाबळी आणि छळाचा गुन्हा दाखल केला असून पुढील तपास सुरू आहे.