महाराष्ट्र: राहुल गांधी बायको आणि मुलाला भेटण्यासाठी व्हिएतनामला गेले आहेत भाजपा आमदार परिणय फुके यांचा खळबळजनक दावा

महाराष्ट्र: काँग्रेस पक्षाचे ज्येष्ठ नेते आणि लोकसभेतील विरोधी पक्षनेते राहुल गांधी यांच्याविषयी भारतीय जनता पक्षाच्या (भाजपा) नेत्यांकडून सातत्याने वादग्रस्त विधाने केली जात असून, यात आता भर पडली आहे. भाजपाचे आमदार परिणय फुके यांनी राहुल गांधी यांच्या वैयक्तिक आयुष्याबद्दल आणि त्यांच्या अलीकडील परदेश दौऱ्याबाबत एक अत्यंत खळबळजनक आणि वादग्रस्त दावा केला आहे. राहुल गांधी हे सध्या व्हिएतनाम दौऱ्यावर असताना, ते तिथे आपल्या पत्नी आणि मुलाला भेटण्यासाठी गेले आहेत, असे वक्तव्य आमदार परिणय फुके यांनी केले असून यामुळे राजकीय वर्तुळात मोठी चर्चा रंगली आहे.

परिणय फुके नेमके काय म्हणाले? एका वृत्तवाहिनीशी संवाद साधताना आमदार परिणय फुके म्हणाले की, "राहुल गांधी सध्या व्हिएतनामच्या दौऱ्यावर गेले आहेत आणि त्यांच्या या दौऱ्यावरून अनेकदा चर्चा होत असतात. मात्र, यात काही चुकीचे नाही, कारण प्रत्येक व्यक्तीला काही महिने काम केल्यानंतर आपल्या कुटुंबाची आठवण येत असते. राहुल गांधी यांनाही आपल्या बायको आणि मुलाची आठवण आल्यामुळेच ते व्हिएतनामला गेले आहेत."

यावेळी जेव्हा त्यांना राहुल गांधींच्या विवाहाबाबत विचारण्यात आले, तेव्हा फुके म्हणाले की, "राहुल गांधी भलेही स्वतःला अविवाहित असल्याचे सांगत असतील, परंतु त्यांच्या पक्षातील अनेक लोक आणि वेगवेगळ्या फोटोंच्या माध्यमातून त्यांचा परिवार तिथे असल्याचे स्पष्ट होते. राहुल गांधी यांचे केवळ व्हिएतनाममध्येच नव्हे तर चीन, अमेरिका, थायलँड आणि इटली यांसारख्या विविध देशांमध्ये परिवार असल्याचा दावा लोक करतात."

देशविरोधी शक्तींच्या भेटीवर आक्षेप: आमदार परिणय फुके यांनी पुढे असेही स्पष्ट केले की, जर ते त्यांच्या कुटुंबाला भेटत असतील तर त्यात काही गैर नाही किंवा आमच्या कोणाच्याही पोटात त्यामुळे दुखत नाही. परंतु, जर ते परदेशात जाऊन विदेशी शक्तींना भेटत असतील आणि तिथून देशविरोधी कारवायांचे आदेश किंवा अजेंडा घेऊन येत असतील, तर मात्र या सर्व प्रकरणाची सखोल चौकशी झाली पाहिजे, असा संशय त्यांनी व्यक्त केला.

ठाकरे बंधूंवरही जोरदार टीका: याच पत्रकार परिषदेत बोलताना परिणय फुके यांनी उद्धव ठाकरे आणि मनसे प्रमुख राज ठाकरे या दोन्ही ठाकरे बंधूंवरही तीव्र शब्दांत निशाणा साधला. ते म्हणाले की, हे दोन्ही नेते सध्या पूर्णपणे वैफल्यग्रस्त झाले आहेत. उद्धव ठाकरे हे राहुल गांधींची चमचेगिरी करत आहेत, तर राज ठाकरे हे केवळ भिवंडी किंवा इतर ठिकाणच्या राजकारणाबद्दल बोलतात. २०१९ मध्ये उद्धव ठाकरेंनी मोदी आणि फडणवीस यांची साथ सोडून काँग्रेसचे पाय धरल्यापासूनच त्यांच्या पक्षाची अधोगती सुरू झाली आहे, असा घणाघातही त्यांनी यावेळी केला. त्यांच्या या वक्तव्यामुळे राजकीय वातावरण चांगलेच तापले असून विरोधकांकडून यावर तीव्र प्रतिक्रिया उमटण्याची शक्यता आहे.