कोल्हापूर: संकश्र्वर-आजरा मार्गावर भीषण अपघात! गोव्याहून प्री-वेडिंग शूट आटोपून नांदेडला परतणाऱ्या तरुणाच्या कारचा भीषण अपघात, जागीच मृत्यू

कोल्हापूर: आजरा आंबोली मार्गावर झालेल्या चारचाकीच्या अपघातात धनराज प्रतापराव कल्याणकर (वय २३, रा. भोशी, ता. भोकर, जि. नांदेड) हा जागीच ठार झाला आहे. गोव्याहून प्री-वेडिंग शूटिंग करून जात असताना हा अपघात झाला आहे. भरधाव वेगाने आलेल्या चारचाकीने रस्त्याकडेला असलेल्या एस. के. गॅरेजमध्ये घुसून रॅम्पवरील गाडीला जोराची धडक दिली. पहाटे ५ वाजता हा अपघात झाला असून त्यामध्ये गाडीचे नुकसान झाले आहे.

नांदेड जिल्ह्यातील चौघे मित्र गोव्याला प्री-वेडिंग शूटिंग करण्यासाठी चारचाकीने गेले होते. शुटींग करून रात्री गोव्याहून ते नांदेडला जात होते. पहाटे ५ वाजता धनराज कल्याणकर याच्या ताब्यातील गाडीवरील ताबा सुटल्याने गाडी हॉटेल मिनर्व्हच्या बाजूस असलेल्या एस. के. गॅरेजमध्ये घुसली. त्याठिकाणी रॅम्पवर असलेल्या गाडीला जोराने धडक दिली. अपघातात धनराज याच्या डोकीला गंभीर दुखापत झाल्याने तो रक्ताच्या थारोळ्यात गाडीतच अडकला व उपचारापूर्वीच त्याचा मृत्यू झाला.

गाडीतील शुभम वसंत कावळे (वय २७) हा गंभीर जखमी आहे तर गाडीमधील हिराकंत महादेव उत्सुरे (वय ३८) व दीपक गुट्टे साईनगर ता. जि नांदेड) साईनगर ता. जि नांदेड) हे किरकोळ जखमी झाले आहेत. गाडीतील एअरबॅगमुळे शुभम कावळे वाचला असून तो गंभीर जखमी आहे.

अपघाताची माहिती मिळताच रात्रीच्या गस्तीवर असलेले सहाय्यक पोलिस निरीक्षक बाबासाहेब सरवदे, पोहेकॉ साजिद शिकलगार, दयानंद बेनके हे तातडीने घटनास्थळी दाखल झाले. जखमी व मयत यांना गाडीतून बाहेर काढून त्यांनी आजरा ग्रामीण रुग्णालयात दाखल केले. गंभीर जखमी शुभम कावळे याच्यावर गडहिंग्लज येथे उपचार सुरू आहेत. रात्री उशिरा धनराज कल्याणकर याचे नातेवाईक आजऱ्यात आल्यानंतर मृतदेह त्यांच्या ताब्यात देण्यात आला. अधिक तपास पोहेकॉ अनिल सरंबळे करीत आहेत.