सिंधुदुर्ग: कणकवलीत महिला पोलिस हवालदार स्मिता माने यांचा जंगलात संशयास्पद मृत्यू ; नातेवाईकांच्या गंभीर आरोपानंतर पोलिस पती सचिन माने अखेर अटकेत!

सिंधुदुर्ग: कणकवली पोलिस ठाण्यात कार्यरत असलेल्या ३८ वर्षीय महिला पोलिस हवालदार स्मिता सचिन माने यांच्या संशयास्पद मृत्यू प्रकरणाने संपूर्ण पोलिस दलात आणि कोकणात प्रचंड खळबळ उडवून दिली आहे. दोन दिवसांपासून बेपत्ता असलेल्या स्मिता माने यांचा मृतदेह रविवारी दुपारी बिडवाडी-हुंबरणे येथील जंगलमय भागात झाडाला गळफास घेतलेल्या अवस्थेत आढळून आला. या प्रकरणी स्मिता यांच्या बहिणीने आणि माहेरच्या नातेवाइकांनी छळ व घातपाताचे गंभीर आरोप केल्यानंतर, कणकवली पोलिसांनी मध्यरात्री उशिरा त्यांचे पती तथा पोलिस कॉन्स्टेबल सचिन माने यांना अटक केली आहे.

दोन दिवसांपासून होत्या बेपत्ता; सामान आवरावर सुरू असताना अचानक घडला प्रकार: मिळालेल्या सविस्तर माहितीनुसार, स्मिता माने या गेल्या १८ वर्षांपासून सिंधुदुर्ग पोलिस दलात सेवेत होत्या. त्या आणि त्यांचे पती सचिन माने हे दोघेही कणकवली पोलिस ठाण्यात कार्यरत असून कलमठ-नाडकर्णीनगर येथे वास्तव्यास होते. नुकतीच या पती-पत्नीची कणकवली येथून वैभववाडी पोलिस ठाण्यात प्रशासकीय बदली झाली होती. त्यामुळे त्यांनी ८ आणि ९ ऑक्टोबर रोजी सुट्टी घेतली होती व नव्या ठिकाणी जाण्यासाठी गुरुवारी घरातील सामानाची आवराआवर करत होते. मात्र, शुक्रवारी सकाळपासून स्मिता माने अचानक घरातून गायब झाल्या. पती सचिन माने यांनी त्या बेपत्ता असल्याची तक्रार पोलिसांत दिली होती.

झाडाला गळफास, पण गुडघे जमिनीला टेकलेले; घातपाताचा संशय: रविवार, ११ ऑक्टोबर रोजी दुपारी साडेबारा वाजण्याच्या सुमारास बिडवाडी-हुंबरणे येथील जंगलात स्थानिक ग्रामस्थांना झाडाला लटकलेला मृतदेह दिसला. पोलिसांना माहिती मिळताच त्यांनी घटनास्थळी धाव घेतली. मृतदेहाची पाहणी केली असता तो बेपत्ता स्मिता माने यांचा असल्याचे निष्पन्न झाले.

मृतदेह झाडाला गळफास घेतलेल्या स्थितीत असला तरी त्यांचे दोन्ही गुडघे जमिनीला पूर्णपणे टेकलेले होते. त्यामुळे हा केवळ आत्महत्येचा प्रकार नसून घातपात किंवा हत्या करून मृतदेह लटकवण्यात आला असावा, असा तीव्र संशय व्यक्त केला जात आहे.

कुटुंबाचा आक्रोश आणि पतीवर गंभीर आरोप: स्मिता माने यांच्या मृत्यूची माहिती मिळताच त्यांच्या माहेरच्या नातेवाइकांनी व वडिलांनी कणकवली पोलिस ठाण्यात धाव घेत प्रचंड आक्रोश केला. स्मिता यांच्या बहिणीने व माहेरच्या मंडळींनी पती सचिन माने यांच्यावर कौटुंबिक त्रास, शारीरिक व मानसिक छळ आणि मृत्यूस कारणीभूत ठरल्याचे गंभीर आरोप केले. या तक्रारीनंतर वरिष्ठ पोलिस अधिकाऱ्यांच्या सूचनेनुसार पोलिसांनी आत्महत्येस प्रवृत्त करणे व छळवणुकीच्या कलमांखाली गुन्हा दाखल करत पती सचिन माने यांना मध्यरात्री ताब्यात घेऊन अटक केली.

वरिष्ठ अधिकाऱ्यांकडून प्रकरणाचा सखोल तपास: घटनेचे गांभीर्य ओळखून अप्पर पोलिस अधीक्षक नयोमी साटम यांच्यासह वरिष्ठ पोलिस अधिकाऱ्यांनी घटनास्थळी आणि कणकवली पोलिस ठाण्याला भेट देऊन तपासाची चक्रे वेगाने हलवली आहेत. मृतदेह शवविच्छेदनासाठी पाठवण्यात आला असून फॉरेन्सिक टीमची मदत घेतली जात आहे. स्मिता माने यांच्या पश्चात पती, एक लहान मुलगा व सासरचे नातेवाईक असा परिवार आहे. या धक्कादायक घटनेमुळे संपूर्ण सिंधुदुर्ग जिल्ह्यात शोकाकूल वातावरण पसरले आहे.