पुणे: तुकाराम मुंढेंचा धडाका; भेसळविरोधी मोहिमेमुळे पनीरच्या दरात वाढ; ग्राहकांसमोर नवे आव्हान

पुणे: राज्यात अन्न व औषध प्रशासनाचे (FDA) आयुक्त तुकाराम मुंढे यांनी भेसळयुक्त दूध आणि दुग्धजन्य पदार्थांविरोधात सुरू केलेल्या धडक कारवाईचा परिणाम आता बाजारपेठेत दिसू लागला आहे. राज्यातील अनेक भागांत पनीरच्या दरात लक्षणीय वाढ झाली असून ग्राहक आणि व्यापाऱ्यांमध्ये याची जोरदार चर्चा सुरू आहे.

एफडीएच्या राज्यव्यापी तपासणीत अनेक ठिकाणी निकृष्ट दर्जाचे आणि भेसळयुक्त पनीर आढळल्याने कठोर कारवाई करण्यात आली आहे. यामुळे भेसळयुक्त उत्पादनांचा पुरवठा कमी झाला असून दर्जेदार पनीरची मागणी वाढल्याने बाजारभावात वाढ झाल्याचे व्यापाऱ्यांचे म्हणणे आहे.

दरम्यान, सोशल मीडियावर पनीरच्या वाढत्या किमतींबाबत विविध पोस्ट व्हायरल होत आहेत. काहींनी ही दरवाढ भेसळविरोधी कारवाईचा सकारात्मक परिणाम असल्याचे म्हटले असून, तर काहींनी पनीरचे दर स्थिर होईपर्यंत खरेदी टाळण्याचे आवाहन केले आहे.

एफडीए आयुक्त तुकाराम मुंढे यांनी यापूर्वीच स्वस्त दरात विकल्या जाणाऱ्या पनीरच्या गुणवत्तेबाबत नागरिकांनी सतर्क राहण्याचे आवाहन केले होते. पनीरसह सर्व दुग्धजन्य पदार्थांच्या गुणवत्तेवर कठोर देखरेख ठेवली जाणार असून भेसळ करणाऱ्यांवर कठोर कारवाई सुरूच राहणार असल्याचे त्यांनी स्पष्ट केले आहे.