पुणे : ज्येष्ठ डॉक्टरांच्या घरात घुसून मारहाण अन् खंडणी, 'बिग बॉस' फेम दिव्या शिंदेवर पुण्यात गुन्हा दाखल!

 

पुणे: एका सांस्कृतिक कार्यक्रमाच्या प्रसिद्धीचा मोबदला मागण्याच्या नावाखाली 65 वर्षीय निवृत्त वैद्यकीय अधिकाऱ्याच्या घरात घुसून दहशत माजवल्याप्रकरणी वादग्रस्त सोशल मीडिया रीलस्टार दिव्या शिंदे हिच्या अडचणींत मोठी वाढ झाली आहे. ज्येष्ठ नागरिकाला मारहाण करत तब्बल 5 लाखांची खंडणी उकळण्याचा प्रयत्न केल्याचा गंभीर आरोप तिच्यावर असून, या प्रकरणी काळेपडळ पोलीस ठाण्यात दिव्या शिंदेसह तिचा साथीदार अण्णा ऊर्फ आप्पा ढमढेरे आणि इतर 8 ते 10 जणांविरुद्ध गुन्हा नोंदवण्यात आला आहे.

 

 

नेमकी घटना काय?

तक्रारदार डॉ. विद्याधर गायकवाड (वय 65) हे पुणे कॅन्टोन्मेंट रुग्णालयात मुख्य वैद्यकीय अधिकारी म्हणून प्रदीर्घ सेवा बजावून निवृत्त झाले आहेत. सध्या ते 'करूणादीप फाउंडेशन'च्या सामाजिक उपक्रमांमध्ये सक्रिय आहेत. या संस्थेच्या वतीने पुण्यातील प्रसिद्ध बालगंधर्व रंगमंदिरात 'कला आविष्कार महोत्सव' आयोजित करण्यात आला होता. या कार्यक्रमाच्या प्रसिद्धीचे काम केल्याचा दावा करत दिव्या शिंदे आणि तिच्या सहकाऱ्यांनी डॉ. गायकवाड यांच्याकडे पाच लाख रुपयांची मागणी लावून धरली होती.

डॉक्टरांच्या निवासस्थानी बेकायदेशीरपणे प्रवेश

मात्र, ही रक्कम देण्यास डॉक्टरांनी नकार दिल्याने संशयितांनी थेट गुंडगिरी करत मारहाण करायला सुरुवात केली. तक्रारीनुसार, पैशांचा तगादा फेटाळल्याच्या रागातून दिव्या शिंदेने 8 ते 10 जणांच्या टोळक्यासह डॉक्टरांच्या निवासस्थानी बेकायदेशीरपणे प्रवेश केला. तिथे आरोपींनी घरात गोंधळ घालून सामानाची नासधूस केली आणि ज्येष्ठ नागरिक असलेल्या डॉ. गायकवाड यांना बेदम मारहाण करत जीवे मारण्याची धमकी दिली.

बिग बॉसमधून तडकाफडकी हकालपट्टी

सोशल मीडियावरील रील्समुळे प्रकाशझोतात आलेली दिव्या शिंदे ही यापूर्वीही आपल्या वादग्रस्त वर्तनामुळे चर्चेत राहिली आहे. 'बिग बॉस मराठी'च्या घरात सहस्पर्धकांना धमकावल्याच्या गंभीर आरोपावरून फेब्रुवारी 2026 मध्ये तिची शोमधून तडकाफडकी हकालपट्टी करण्यात आली होती. आता थेट एका सेवानिवृत्त अधिकाऱ्याच्या घरात घुसून खंडणी मागितल्याचे प्रकरण समोर आल्याने खळबळ उडाली आहे. काळेपडळ पोलिसांनी या घटनेची गंभीर दखल घेतली असून, संबंधित आरोपींची चौकशी आणि पुढील कायदेशीर कारवाई वेगाने सुरू आहे.