Shivneri Fort Stampede : शिवजयंती उत्सवाला गालबोट; शिवनेरी किल्ल्यावर चेंगराचेंगरी, लहान मुलांसह अनेक महिला जखमी

Pune : पुणे जिल्ह्यातील किल्ले शिवनेरी येथे शिवजयंतीनिमित्त मोठ्या संख्येने शिवभक्तांनी रात्रीपासूनच गर्दी केली होती. त्यामुळे गडावर मोठी चेंगराचेंगरी झाल्याची धक्कादायक घटना घडली. गडावर जाणाऱ्या मार्गावर भाविकांची प्रचंड गर्दी उसळली होती. दरम्यान, प्रवेशद्वाराजवळ अचानक ढकलाढकली सुरू झाल्याने काही काळ गोंधळाचे वातावरण निर्माण झाले. या घटनेत काही शिवभक्त किरकोळ जखमी झाल्याची प्राथमिक माहिती मिळत असून त्यांना तात्काळ उपचारासाठी स्थानिक रुग्णालयात दाखल करण्यात आले आहे. तसेच या चेंगराचेंगरीत महिला व लहान मुलही जखमी झाले आहेत.

घटनेची माहिती मिळताच पोलीस व आपत्कालीन यंत्रणा घटनास्थळी दाखल झाल्या असून परिस्थिती नियंत्रणात आणण्यात आली आहे. सध्या गडावर गर्दीचे नियोजन करण्यासाठी अतिरिक्त पोलीस बंदोबस्त तैनात करण्यात आला आहे. प्रशासनाकडून शिवभक्तांना संयम राखण्याचं आवाहन करण्यात आलं आहे. या घटनेमुळे शिवजयंती उत्सवाला गालबोट लागलं आहे.

अनेक नागरिक किरकोळ जखमी
अंबरखाण्याच्या खालच्या हत्ती दरवाजा परिसरात तसेच गणेश दरवाजा या अरुंद मार्गांवर नागरिकांची प्रचंड गर्दी झाली. रस्ते अरुंद असल्याने आणि एकाचवेळी मोठ्या संख्येने भाविक पुढे सरकल्याने चेंगराचेंगरीची स्थिती निर्माण झाली. या घटनेत काही महिला व लहान मुलांसह अनेक नागरिक किरकोळ जखमी झाल्याची माहिती मिळाली आहे.

जखमींवर शासकीय रूग्णालयात उपचार सुरू
जखमींना तातडीने जुन्नर येथील शासकीय रुग्णालयात हलवण्यात आले असून त्यांच्यावर उपचार सुरू आहेत. सुदैवाने कोणतीही जीवितहानी झालेली नाही. मात्र, या घटनेमुळे प्रशासनाच्या नियोजनावर प्रश्नचिन्ह उपस्थित झाले आहेत. शिवजयंतीसारख्या मोठ्या उत्सवावेळी दरवर्षी मोठी गर्दी होत असल्यानं भविष्यात योग्य गर्दी नियंत्रण, प्रवेश-निर्गमन मार्गांचे नियोजन आणि पुरेसा पोलीस बंदोबस्त हा अगोदरच्या दिवसांपासूनच गडावर ठेवणं गरजेचं आहे.

पोलिस बंदोबस्त नसल्याचा आरोप
ज्यावेळी गर्दी वाढत होती, त्यावेळी गर्दी नियंत्रणात करण्याचा प्रयत्न उपस्थित पोलिसांनी केला. पण गर्दी अधिक असल्याने चेंगराचेंगरी झाली. या गर्दीत लहाने मुले आणि महिला देखील होत्या. चेंगराचेंगरीच्या घटनेनंतर जखमींना प्रशासनाकडून रूग्णालयात दाखल करण्यात आले. आज सकाळपासूनच शिवजयंतीनिमित्त लोक घराबाहेर पडताना दिसत आहेत.