नाशिक: रस्त्यावरील चिखलामुळे दुचाकी घसरली, पाठीमागून आलेल्या बसच्या धडकेत विवाहितेचा जागीच मृत्यू

नाशिक: शहरात गेल्या आठवडाभरापासून सुरू असलेले अपघातांचे सत्र अद्यापही थांबलेले नाही. बुधवारी (दि. २) त्र्यंबकरोडवरील पपया नर्सरीजवळ रस्ता कामामुळे झालेल्या चिखलामुळे एक दुचाकी अचानक घसरली आणि त्याचवेळी पाठीमागून आलेल्या एका खासगी बसने दुचाकीला जोरदार धडक दिली. या भीषण अपघातात दुचाकीस्वार विवाहिता जागीच ठार झाल्याची दुर्दैवी घटना घडली आहे.

काय आहे नेमकी घटना? पेठ तालुक्यातील खोपोली गावचे रहिवासी असलेले एक तरुण दांपत्य बुधवारी सकाळी ७ वाजण्याच्या सुमारास दुचाकीने (क्र. एम.एच. १५ जीजी १८९२) नाशिकमार्गे त्र्यंबकेश्वरच्या दिशेने जात होते. फिर्यादी शामवेल काशीराम इंपाळ (३२) हे दुचाकी चालवत होते, तर त्यांची पत्नी प्रतीक्षा राजकुमार आवारी (२६, रा. खोपोली, पेठ) या मागे बसल्या होत्या. त्र्यंबकरोडवरील पपया नर्सरीजवळ रस्त्याचं काम सुरू असल्यामुळे तिथे मोठ्या प्रमाणावर चिखल साचला होता. रस्त्यावरील या चिखलाचा चालकाला अंदाज आला नाही, ज्यामुळे त्यांची दुचाकी अचानक घसरली.

बसच्या चाकाखाली सापडल्याने जागीच मृत्यू: दुचाकी घसरल्यानंतर पाठीमागून महाविद्यालयीन विद्यार्थ्यांची वाहतूक करणाऱ्या एका खासगी बसच्या (क्र. एम.एच. १५ एच.एच ६०७१) चालकाने रस्त्याच्या बिकट परिस्थितीकडे दुर्लक्ष केले आणि वेगात असलेल्या बसने दुचाकीला जोरदार धडक देत फरफटत नेले. या अपघातात दुचाकीवरील विवाहिता प्रतीक्षा इंपाळ या बसच्या पुढील चाकाखाली सापडल्या. डोक्याला व शरीराला गंभीर दुखापत झाल्यामुळे त्या जागीच गतप्राण झाल्या.

पोलिसांची कारवाई: अपघाताची माहिती मिळताच सातपूर पोलीस ठाण्याचे वरिष्ठ पोलीस निरीक्षक प्रकाश अहिरे आपल्या पथकासह तातडीने घटनास्थळी दाखल झाले. स्थानिकांच्या मदतीने जखमींना तातडीने जिल्हा रुग्णालयात उपचारासाठी रवाना करण्यात आले. या प्रकरणी सातपूर पोलिसांनी बसचालक संशयित बाळासाहेब पवार (६५, रा. मखमलाबाद) याच्याविरुद्ध भारतीय न्याय संहितेच्या व मोटार वाहन कायद्यानुसार गुन्हा दाखल केला असून, पुढील कायदेशीर तपास सुरू आहे.

आजीला भेटण्याची इच्छा राहिली अर्धवट: शामवेल आणि प्रतीक्षा हे पेठवरून दुचाकीने नाशिकला आले होते. तिथून ते त्र्यंबकेश्वर जवळील काचुर्ली गावी आपल्या आजीला भेटण्यासाठी निघाले होते. मात्र, रस्त्यातच काळाने घाला घातल्यामुळे प्रतीक्षाची आजीला भेटण्याची इच्छा कायमची अर्धवट राहिली. तिच्या अकाली निधनामुळे कुटुंबावर व गावावर शोककळा पसरली असून तिच्या पश्चात आई, वडील, पती आणि भाऊ असा परिवार आहे.

फार्मासिस्ट होण्याचे स्वप्न भंगले: मृत प्रतीक्षा ही फार्मसीचे (Pharmacy) शिक्षण घेत होती आणि भविष्यात एक यशस्वी फार्मासिस्ट बनण्याचे तिचे मोठे स्वप्न होते. ती अभ्यासात अत्यंत हुशार होती. तिचा पती शामवेल हादेखील शहरातील पंचवटी परिसरातील एका महाविद्यालयातून पदव्युत्तर शिक्षण घेत असून, पालघर येथील एका खासगी कंपनीत नोकरी करून कुटुंबाचा आर्थिक उदरनिर्वाह चालवत होता. पती तिला उच्च शिक्षणासाठी सतत प्रोत्साहन देत असे. मात्र, एका दुर्दैवी अपघाताने या तरुण कुटुंबाचे हसते-खेळते विश्व उद्ध्वस्त केले आहे.