पुणे: 'डीजेविरोधी' भूमिकेमुळे चर्चेत आलेले विद्यानंद बापट थेट राजकारणात उतरणार का? पुणे पदवीधर मतदारसंघाच्या निवडणुकीवरून चर्चांना उधाण!

पुणे: महाराष्ट्रात आगामी काळात शिक्षक आणि पदवीधर मतदारसंघांसाठी द्वैवार्षिक निवडणुकांचा कार्यक्रम पार पडणार आहे. विद्यमान सदस्यांचा कार्यकाळ संपत असल्याने राज्यातील महत्त्वाच्या अशा तीन पदवीधर आणि दोन शिक्षक मतदारसंघांमध्ये निवडणुका होणार आहेत. या राजकीय घडामोडींमध्येच, पुण्यातील ध्वनिप्रदूषण, ढोलवादन आणि डीजेच्या कर्णकर्कश दणदणाटाविरोधात सडेतोड भूमिका घेत राज्यभरात चर्चेत आलेले विद्यानंद बापट यांच्या संभाव्य राजकारण प्रवेशावरून जोरदार चर्चा सुरू झाली आहे. प्रसिद्ध वकील असीम सरोदे यांनी सोशल मीडियावर केलेल्या एका विशेष पोस्टमुळे या चर्चांना मोठे उधाण आले आहे.

पुण्यातील गणेशोत्सव आगमन आणि विसर्जन मिरवणुकांमध्ये होणाऱ्या अवाजवी ध्वनिप्रदूषणाविरुद्ध आणि डीजेच्या वापराविराधात विद्यानंद बापट यांनी अत्यंत निर्भयपणे आवाज उठवला होता. एवढेच नव्हे तर या भूमिकेमुळे त्यांच्यावर काही हल्ल्याचे प्रसंगही ओढवले, परंतु तरीही त्यांनी आपली भूमिका कायम ठेवली. आपल्या उत्तम मराठी भाषेवरील प्रभुत्व, सुसंस्कृत शैली आणि रोखठोक विचारांमुळे ते अल्पावधीतच महाराष्ट्रभर पोहोचले आणि एका रात्रीत जनमानसात लोकप्रिय ठरले. उत्सवांचे बिघडत चाललेले स्वरूप आणि त्यातील ओंगळवाणेपणा त्यांनी अत्यंत अभ्यासपूर्ण पद्धतीने चव्हाट्यावर आणला.

असीम सरोदे यांची 'एक्स' (ट्विटर) पोस्ट ठरली चर्चेचे केंद्र:

प्रसिद्ध वकील असीम सरोदे यांनी विद्यानंद बापट यांच्यासोबतचा आपला फोटो शेअर करत सोशल मीडियावर एक महत्त्वाची पोस्ट लिहीली आहे. या पोस्टमध्ये त्यांनी म्हटले आहे की, "माझ्यासोबत उभ्या असलेल्या व्यक्तीचा आता खूप परिचय देण्याची आवश्यकता उरली नाही. ध्वनिप्रदूषणाच्या राक्षसाविरोधात निर्भयपणे उभा असणारा 'विद्यानंद बापट' हा अनेकांच्या मनातील दुःख बोलणारा आणि उत्सवांचे विकृत स्वरूप चव्हाट्यावर आणणारा खरा हिरो ठरला आहे."

पुढे बोलताना सरोदे यांनी, "विद्याविभूषित, सुसंकृत, विनम्र, अभ्यासू आणि प्रत्येक सामाजिक प्रश्नाची नेमकी जाणीव असणारा विद्यानंद बापट आज प्रत्येक घरातील आपुलकीचा सदस्य बनला आहे. भाषेचा स्तर अजिबात बिघडू न देता, विषयाला घट्ट धरून बोलणारा आणि समाजाला वैश्विक बनविण्याची क्षमता असणाऱ्या विद्यानंद बापट यांनी आगामी 'पुणे पदवीधर मतदारसंघाची' निवडणूक लढवावी का? तुम्हाला काय वाटते?" अशी खुली विचारणा जनतेला केली आहे.

सोशल मीडियावर संमिश्र आणि उत्साही प्रतिक्रिया:

असीम सरोदे यांच्या या पोस्टनंतर सोशल मीडियावर जोरदार वाद-विवाद आणि चर्चेला सुरुवात झाली आहे. अनेक नेटकऱ्यांनी आणि नागरिकांनी विद्यानंद बापट यांच्या संभाव्य उमेदवारीचे जोरदार स्वागत केले आहे. भारतीय समाजाला अशाच निर्भीड, तर्ककठोर आणि वैचारिकदृष्ट्या प्रगल्भ माणसाची गरज असून बापट यांनी ही निवडणूक लढवावी, ते १०० टक्के विजयी होतील, अशा प्रतिक्रिया काहींनी दिल्या आहेत. तर दुसरी मतदारसंघातल्या मतदारांची जागरूकता आणि राजकीय समीकरणे कशी असतील, यावरही सोशल मीडियावर युझर्सकडून विविध तर्क-वितर्क लढवले जात आहेत. यामुळे आगामी पुणे पदवीधर मतदारसंघाच्या निवडणुकीत विद्यानंद बापट यांच्या भूमिकेकडे संपूर्ण महाराष्ट्राचे लक्ष लागले आहे.