स्वयंपाकघरात अस्वच्छता अन् झुरळांचे साम्राज्य!' 'सेफ फूड सेफ महाराष्ट्र' मोहिमेंतर्गत लोणावळ्यातील ४ नामांकित हॉटेल्सचे अन्न परवाने निलंबित!

नागरिकांच्या आरोग्याशी खेळ करणाऱ्या तसेच अन्न सुरक्षा व स्वच्छतेच्या नियमांचे उल्लंघन करणाऱ्या हॉटेल्स आणि रेस्टॉरंट्सविरोधात अन्न व औषध प्रशासनाने (FDA) कडक भूमिका घेतली आहे. नागरिकांच्या सुरक्षिततेसाठी राबविण्यात येत असलेल्या 'Safe Food Safe Maharashtra' या विशेष मोहिमेंतर्गत पुणे जिल्ह्यातील प्रसिद्ध पर्यटनस्थळ असलेल्या लोणावळा परिसरातील प्रमुख हॉटेल्स व रेस्टॉरंट्सची तपासणी करण्यात आली. या कारवाईत लोणावळ्यातील चार नामांकित हॉटेल्सचे अन्न परवाने तात्काळ निलंबित करण्यात आल्याची माहिती समोर आली आहे.

स्वच्छतेचा अभाव, झुरळे आणि अन्न साठवणुकीतील त्रुटी उघड:

एफडीएच्या पथकाने केलेल्या तपासणीत संबंधित हॉटेल्सच्या स्वयंपाकघरातील आणि बेकरी विभागातील अस्वच्छता, कीटक व झुरळांचा वावर, तसेच अन्नपदार्थांच्या साठवणुकीतील गंभीर त्रुटी निदर्शनास आल्या. काही ठिकाणी स्वयंपाकघराच्या फरशीवर पाणी साचणे, झाकण नसलेले कचऱ्याचे डबे ठेवणे, कच्चे व शिजवलेले किंवा शाकाहारी व मांसाहारी अन्नपदार्थ स्वतंत्रपणे न ठेवणे, पदार्थांवर व बाटल्यांवर लेबल नसणे, तसेच उपकरणे व यंत्रांची नियमित खोलवर स्वच्छता (डीप क्लीनिंग) न करणे अशा बाबी आढळून आल्या. तसेच कामगारांसाठी आवश्यक वैद्यकीय प्रमाणपत्रे, प्रशिक्षण प्रमाणपत्रे, पेस्ट कंट्रोल नोंदी, वापरलेल्या खाद्यतेलाच्या नोंदी आणि परवान्यातील इतर नियमांचे पालन न केल्याचेही समोर आले.

चारही हॉटेल्सचे अन्न परवाने निलंबित; नियमांचे कठोर पालन करण्याचा इशारा:

तपासणीमध्ये आढळलेल्या या गंभीर त्रुटी आणि अन्न सुरक्षा नियमांच्या उल्लंघनाची गंभीर दखल घेत प्रशासनाने लोणावळ्यातील त्या चारही नामांकित हॉटेल्सचे अन्न परवाने निलंबित करण्याची कारवाई केली आहे. पर्यटनासाठी मोठ्या प्रमाणावर येणाऱ्या नागरिक व पर्यटकांचे आरोग्य सुरक्षित राहावे, यासाठी अन्न व्यवसायांनी स्वच्छता, साठवणूक आणि सर्व कायदेशीर मानकांचे काटेकोर पालन करणे बंधनकारक आहे. नियमांचे उल्लंघन करणाऱ्या आस्थापनांविरोधात परवाने निलंबित करणे किंवा रद्द करणे यासारखी कठोर कारवाई पुढेही सुरूच राहील, असा स्पष्ट इशारा अन्न व औषध प्रशासनाकडून देण्यात आला आहे.

 

 



महाराष्ट्र

गुन्हा

राजकीय

विडियो गॅलेरी

Leave a Reply

Your email address will not be published. Required fields are marked *