गडचिरोली: आश्रम शाळेत झोपलेल्या तीन निष्पाप विद्यार्थिनींचा सर्पदंशाने मृत्यू; खाटांच्या अभावी जमिनीवर झोपणे पडले महागात.

गडचिरोली: जागतिक आदिवासी दिनाचा आनंदोत्सव साजरा होत असतानाच, धानोरा तालुक्यातील 'जपतलाई' येथील एका अनुदानित आदिवासी आश्रम शाळेत अत्यंत संतापजनक आणि काळीज पिळवटून टाकणारी घटना समोर आली आहे. शाळेच्या वसतिगृहात झोपेत असताना विषारी साप चावल्यामुळे तीन चिमुरड्या विद्यार्थिनींचा जागीच दुर्दैवी मृत्यू झाला आहे. या घटनेने केवळ पालकांमध्येच नव्हे, तर संपूर्ण परिसरात मोठा आक्रोश निर्माण झाला आहे.

काय आहे नेमके प्रकरण? जपतलाई येथील 'कुप्पा लिंगो शैक्षणिक व संस्कृती विकास संशोधन शाळा' या अनुदानित आश्रम शाळेच्या वसतिगृहात ही दुर्घटना घडली. शुक्रवारी रात्री साधारणतः अडीच वाजण्याच्या सुमारास वसतिगृहात झोपलेल्या विद्यार्थिनींना विषारी सापाने दंश केला. यामध्ये सुश्मिता सरोजित मंडल (१४), दीपिका एतवा लकडा (१२) आणि अनु गजुराम कोरेटी (८) या तीन विद्यार्थिनींचा मृत्यू झाला आहे. या घटनेत दीपिका बिटलूरसाय मडावी (११), समृद्धी सुरेश नैताम (१४) आणि कविता राजकुमार किरंगा (१२) या इतर तीन मुलींची प्रकृती अत्यंत चिंताजनक असून, त्यांच्यावर रुग्णालयात उपचार सुरू आहेत.

प्रशासनाचा गंभीर हलगर्जीपणा या घटनेनंतर शाळेतील सोयीसुविधांचा भयावह चेहरा समोर आला आहे. वसतिगृहात विद्यार्थिनींना झोपण्यासाठी पुरेशा खाटा (बेड्स) उपलब्ध नाहीत, अशी तक्रार अनेकदा करूनही प्रशासनाने त्याकडे पूर्णपणे दुर्लक्ष केले. यामुळे नाईलाजाने या मुलींना जमिनीवर गादी टाकून झोपावे लागते. एवढेच नाही तर, ही घटना घडली तेव्हा वसतिगृहाची महिला अधीक्षक कर्तव्यावर उपस्थित नव्हत्या, असा धक्कादायक प्रकार समोर आला आहे. आदिवासी विद्यार्थ्यांच्या सुरक्षेबाबतचा हा हलगर्जीपणा आता त्यांच्या जीवावर बेतला आहे.

आक्रमक रोष या घटनेनंतर 'आझाद समाज पार्टी'ने प्रशासनावर तीव्र शब्दांत टीका केली आहे. संस्थेचे पदाधिकारी आणि प्रकल्प अधिकारी वातानुकूलित कार्यालयात बसत असताना, आदिवासी मुलांची स्थिती अतिशय दयनीय असल्याचे त्यांनी म्हटले आहे. संबंधित अधिकाऱ्यांवर त्वरित निलंबनाची कारवाई करावी आणि जबाबदारी स्वीकारून संबंधित पदाधिकाऱ्यांनी राजीनामा द्यावा, अशी मागणी आता जोर धरू लागली आहे.