ठाणे: निवृत्त साहाय्यक आयुक्त महेश आहेर यांच्यावर लैंगिक अत्याचाराचा गुन्हा; नाशिकच्या 'भोंदू' अशोक खरातचे कनेक्शन उघड

ठाणे: ठाणे महानगरपालिकेचे वादग्रस्त माजी साहाय्यक आयुक्त महेश आहेर पुन्हा एकदा मोठ्या वादात सापडले आहेत. एका महिला कर्मचाऱ्याने केलेल्या गंभीर तक्रारीनंतर त्यांच्यावर लैंगिक अत्याचाराचा गुन्हा दाखल करण्यात आला आहे. विशेष म्हणजे, या संपूर्ण प्रकरणात नाशिकचा स्वयंघोषित भोंदू बाबा 'कॅप्टन' अशोक खरात याचेही नाव समोर आल्याने खळबळ उडली आहे.

नेमकी घटना काय?
पीडित महिलेने कासारवडवली पोलीस ठाण्यात दिलेल्या फिर्यादीनुसार, २०२० ते २०२३ या कालावधीत महेश आहेर यांनी घोडबंदर रोडवरील एका सदनिकेत तिला शीतपेयातून गुंगीकारक औषध देऊन तिच्यावर अत्याचार केला. एवढेच नाही तर या कृत्याचे चित्रीकरण (व्हिडिओ) करून ते सोशल मीडियावर व्हायरल करण्याची धमकी देऊन वारंवार ब्लॅकमेल केल्याचा आरोपही पीडितेने केला आहे.

अशोक खरातचे कनेक्शन:
तक्रारीत नमूद केल्यानुसार, महेश आहेर यांनी पीडित महिलेला नाशिक येथील भोंदू बाबा अशोक खरात याच्याकडे नेले होते. खरात हा मोठा ज्योतिषी असल्याचे सांगून आहेर यांनी पीडितेवर अघोरी उपाय करण्याचा प्रयत्न केला. खरातने पीडितेवरून लिंबू उतरवणे आणि तिला विशिष्ट खडा गळ्यात घालण्यास सांगणे, अशा प्रकारच्या कृती केल्याचा उल्लेख तक्रारीत आहे. यावरून महेश आहेर आणि अशोक खरात यांचे गुन्हेगारी संगनमत असल्याचे पोलीस तपासात समोर येत आहे.

महेश आहेर यांचा वादग्रस्त इतिहास:
महेश आहेर हे ठाणे महापालिकेत कार्यरत असतानाही अनेकदा वादात राहिले आहेत. काही वर्षांपूर्वी राष्ट्रवादी काँग्रेसचे (शरद पवार गट) आमदार जितेंद्र आव्हाड यांच्या कुटुंबीयांना जीवे मारण्याची धमकी दिल्याचा आरोप त्यांच्यावर झाला होता, ज्यावरून त्यांना महापालिका मुख्यालयाबाहेर मारहाणही झाली होती. आता लैंगिक अत्याचारासारखा गंभीर गुन्हा दाखल झाल्याने त्यांच्या अडचणीत मोठी वाढ झाली आहे. पोलीस या प्रकरणाचा सखोल तपास करत आहेत.