बुलढाणा: समृद्धी महामार्गावर थरारक आणि भीषण अपघात! भरधाव ट्रकने रांगेत उभ्या असलेल्या २५ वाहनांना उडवले; ५ जण जखमी

बुलढाणा: नागपूर-मुंबई समृद्धी महामार्गावर एक अत्यंत भीषण आणि थरारक अपघात घडल्याची धक्कादायक घटना समोर आली आहे. महामार्गावर आधीच एक टँकर पलटी झाल्यामुळे वाहतूक थांबली होती आणि रस्ता मोकळा होण्याची वाट पाहत प्रवासी आपापल्या वाहनांमध्ये थांबले होते. याच दरम्यान मागून आलेल्या एका भरधाव ट्रकने वाहनांच्या रांगेत थेट घुसून तब्बल २५ वाहनांना जोरदार धडक दिली. बुलढाणा जिल्ह्यातील दुसरबीडजवळ तळेगाव परिसरात दुपारी १२ वाजण्याच्या सुमारास हा अपघात घडला. या अपघातात सुमारे २५ वाहनांचे मोठे नुकसान झाले असून, ४ ते ५ जण गंभीर जखमी झाले आहेत.

नेमकं काय घडलं?

मिळालेल्या सविस्तर माहितीनुसार, मुंबईच्या दिशेने जाणाऱ्या मार्गिकेवर ३२१ व्या किलोमीटरजवळ सकाळीच एक टँकर पलटी झाला होता. या टँकरमधील माल रस्त्यावर पसरल्यामुळे त्या ठिकाणची वाहतूक पूर्णपणे ठप्प झाली होती. पलटी झालेला टँकर क्रेनच्या साहाय्याने बाजूला करून रस्ता मोकळा करण्याचे काम सुरू होते. सुरक्षेचा उपाय म्हणून पोलिसांनी तिथे वाहतूक थांबवली होती, ज्यामुळे महामार्गावर वाहनांची लांबच लांब रांग लागली होती.

दरम्यान, लोखंडी गुंडाळ्या (कॉइल) घेऊन जाणारा एक भरधाव ट्रक (एमएच ४० बीएल ४९१४) मागून अत्यंत वेगात आला. समोरील वाहनांची लांब रांग असताना आणि पोलीस अथवा इतर वाहने उभी असतानाही हा ट्रक चालकाला नियंत्रित करता आला नाही. या भरधाव ट्रकने थेट मागून उभ्या असलेल्या वाहनांना जोरदार धडक दिली.

धडकेमुळे वाहनांचा झाला चुराडा

ट्रकची धडक इतकी प्रचंड होती की, एकापाठोपाठ एक अशी तब्बल २५ वाहने एकमेकांवर आदळली. या मालिकेतील ७ ते ८ वाहनांचा अक्षरशः चुराडा झाला असून, वाहनांचे मोठे नुकसान झाले आहे. या अचानक झालेल्या भीषण धडकेमुळे समृद्धी महामार्गावर काही काळ एकच तारांबळ आणि भीतीचे वातावरण पसरले होते.

सकाळच्या पहिल्या अपघातामुळे आधीच खोळंबलेल्या वाहतुकीला या दुसऱ्या मोठ्या अपघाताचा तीव्र फटका बसला. घटनेची माहिती मिळताच महामार्ग पोलीस आणि स्थानिक प्रशासन तात्काळ घटनास्थळी दाखल झाले. त्यांनी जखमी प्रवाशांना उपचारासाठी तातडीने जवळच्या रुग्णालयात दाखल केले. तसेच, अपघातग्रस्त वाहने क्रेनच्या साहाय्याने बाजूला करून महामार्गावरील वाहतूक सुरळीत करण्यात आली.

ट्रकचालकाच्या भूमिकेवर प्रश्नचिन्ह

समोर वाहनांची मोठी रांग उभी असताना आणि वाहतूक थांबलेली असतानाही ट्रकचालकाला आपला ट्रक का थांबवता आला नाही, याबाबत आता गंभीर प्रश्न उपस्थित केले जात आहेत. चालकाने मद्यप्राशन केले होते का किंवा डुलकी लागली होती का, या सर्व बाबींचा पोलिसांकडून कसून तपास केला जात आहे. समृद्धी महामार्गावर वारंवार होणाऱ्या अशा अपघातांविषयी प्रवाशांमधून तीव्र चिंता व्यक्त केली जात आहे.