सोलापूर आयटी पार्कचा मार्ग मोकळा! कृष्णा खोरे नियामक मंडळाकडून लॉजिस्टिक पार्कचा जुना ठराव रद्द; २० हेक्टर जागा एमआयडीसीकडे हस्तांतरित होणार

सोलापूर : सोलापूर जिल्ह्यातील आणि विशेषतः आयटी क्षेत्रातील सुशिक्षित तरुण अभियंत्यांसाठी अत्यंत महत्त्वाची आणि दिलासादायक बातमी आहे. होटगी (ता. दक्षिण सोलापूर) येथील जलसंपदा विभागाच्या जागेवर साकारल्या जाणाऱ्या बहुप्रतिक्षित 'सोलापूर आयटी पार्क'चा (Solapur IT Park) मार्ग आता खऱ्या अर्थाने मोकळा झाला आहे. कृष्णा खोरे विकास महामंडळाच्या (MKVDC) नियामक मंडळाने यापूर्वीचा 'लॉजिस्टिक पार्क'चा ठराव रद्द केला असून, ही २० हेक्टर मोक्याची जागा आता आयटी पार्कसाठी एमआयडीसीकडे (MIDC) विनामोबदला हस्तांतरित करण्याची प्रक्रिया अंतिम टप्प्यात आली आहे.

लॉजिस्टिक पार्कचा ठराव रद्द, आयटी पार्कला प्राधान्य

साधारणतः २०२१-२२ मध्ये होटगी येथील तलावाच्या जमिनीमधील (गट क्र. ५७६) २० हेक्टर जागा लॉजिस्टिक पार्क उभारण्यासाठी देण्याचा ठराव कृष्णा खोरे विकास महामंडळाच्या नियामक मंडळात संमत झाला होता. मात्र, सोलापूर शहरात विमानसेवा सुरू झाल्यानंतर येथे मोठ्या प्रमाणावर आयटी हब आणि रोजगार निर्मिती व्हावी, अशी मागणी स्थानिक तरुण आणि लोकप्रतिनिधींकडून होत होती. या पार्श्वभूमीवर, महायुती सरकारने जुना ठराव रद्द करून ही जागा आयटी पार्कसाठी देण्याचा मोठा निर्णय घेतला आहे. यामुळे जागा हस्तांतरणातील तांत्रिक अडचण दूर झाली आहे.

नियामक मंडळाच्या आगामी बैठकीत अंतिम मंजुरी

जलसंपदा विभागाकडून ही २० हेक्टर जागा एमआयडीसीला विनामोबदला हस्तांतरित करण्यासाठी नियामक मंडळाच्या आगामी बैठकीत अंतिम मंजुरी दिली जाईल. साधारणतः दोन महिन्यांतून एकदा होणाऱ्या या बैठकीत हा ठराव लवकरात लवकर मंजूर व्हावा यासाठी पालकमंत्री जयकुमार गोरे आणि सोलापूरचे जिल्हाधिकारी कार्तिकेयन एस. सातत्याने प्रयत्न करत आहेत. जागा हस्तांतरित होताच एमआयडीसीकडून अधिकृत अधिसूचना प्रसिद्ध केली जाईल आणि त्यानंतर प्रत्यक्ष निविदा प्रक्रिया राबवून आयटी पार्कच्या बांधकामाला सुरुवात होणार आहे.

युवकांसाठी रोजगार क्रांती आणि वीज करार

मुख्यमंत्री देवेंद्र फडणवीस यांचा 'ड्रीम प्रोजेक्ट' म्हणून या होटगी आयटी पार्ककडे पाहिले जात आहे. सोलापुरात हा प्रकल्प पूर्ण झाल्यानंतर स्थानिक व परिसरातील हजारो तरुण अभियंत्यांना पुणे, मुंबई किंवा बेंगलोर येथे न जाता सोलापुरातच रोजगाराच्या उत्तम संधी उपलब्ध होणार आहेत. यामुळे नोकरीसाठी होणारे तरुणांचे स्थलांतर थांबेल. विशेष म्हणजे, या आयटी पार्कला अखंडित वीजपुरवठा करण्यासाठी 'एनटीपीसी'च्या (NTPC) सौरऊर्जा निर्मिती प्रकल्पासोबत आधीच विशेष करार करण्यात आला आहे.

होटगीतील तलावाच्या जागेचा ताळेबंद (एकूण २८४.७४ हेक्टर):

• बुडीत क्षेत्र: २४० हेक्टर

• प्रस्तावित आयटी पार्कसाठी: २० हेक्टर

• सौरऊर्जा (सोलार) प्रकल्पासाठी: १४.६५ हेक्टर

• पर्यटन विकासासाठी: ३.८३ हेक्टर

• महावितरण (MSEB) उपकेंद्रासाठी: २.८ हेक्टर

• प्राथमिक आरोग्य केंद्रासाठी: ०.६९ हेक्टर