Rain Update : आठवडाभरानंतर पावसाची हजेरी; गडचिरोली, भंडारा, नंदुरबार जिल्ह्यात जोरदार पाऊस

Rain Update : पंधरा दिवसांपूर्वी राज्यात सर्वदूर झालेल्या जोरदार पावसानंतर आठवडाभरापासून पावसाने विश्रांती घेतली होती. यामुळे शेतकऱ्यांच्या नजरा आभाळाकडे लागल्या होत्या. दरम्यान आठवडाभराच्या विश्रांतीनंतर राज्यातील काही भागात पावसाचे आगमन झाले आहे. यात गडचिरोली, भंडारा व नंदुरबार जिल्ह्यात जोरदार पाऊस झाल्याचे पाहण्यास मिळाले. मात्र अनेक भागात पावसाची प्रतीक्षा आहे.

गडचिरोली जिल्ह्यात पावसाची दमदार हजेरी

गडचिरोली जिल्ह्यात आठवड्याभराच्या विश्रांतीनंतर अखेर पावसाने दमदार हजेरी लावली आहे. विजेच्या कडकडाटासह पावसाने हजेरी लावल्यामुळे पिकांना जीवदान मिळाले आहे. आजच्या पावसामुळे सर्वात जास्त फायदा शेतकरी बांधवांना मिळणार आहे. आठवडाभरापासून पावसाने विश्रांती घेतली होती. त्यामुळे शेतकरी पुन्हा संकटात सापडलेला होता. मात्र आजच्या पावसामुळे शेतकरी सुखावला आहे.

भंडारा जिल्ह्यातही दमदार हजेरी भंडारा : भंडारा जिल्ह्यात आठवड्याभराच्या विश्रांतीनंतर अखेर पावसाने दमदार हजेरी लावली आहे. विजांच्या कडकडाटासह पावसाने हजेरी लावल्यामुळे धान पिकांना नवसंजीवनी मिळणार आहे. तर उकाड्यापासून हैराण झालेला नागरिकांना यामुळे दिलासा मिळाला आहे. पावसाने आठवडाभरापासून दडी मारल्यामुळे शेतकरी संकटात चिंतेत होता. भंडारा जिल्ह्यातील तुमसर तालुक्यात आज पावसाने जोरदार हजेरी लावल्याने शेतकऱ्यांनी शेतात लावलेल्या धानाला यामुळे फायदा होणार आहे.

दोन आठवड्यांच्या विश्रांतीनंतर नंदुरबार जिल्ह्यात पाऊस

नंदुरबार जिल्ह्यात देखील मागील अनेक दिवसांपासून पावसाने दडी मारली होती. कडक ऊन पडत असल्याने शेतातील पिके देखील कोमेजू लागली होती. यामुळे शेतकरी चिंताग्रस्त होते. दरम्यान आज सातपुड्याचा अक्राणी परिसरात मुसळधार पाऊस झाला. पाऊस अभावी तयार झालेल्या दमट वातावरणापासून सुटका मिळणार असून अचानक आलेल्या पावसामुळे बाजारासाठी आलेल्या नागरिकांची चांगलीच तारांबळ उडाली.