सिंधुदुर्ग:आंबोली घाटात पर्यटकांच्या गर्दीत बेपत्ता झालेली १५ वर्षीय मुलगी पोलिसांच्या तत्परतेने अवघ्या अर्ध्या तासात सुखरूप सापडली

सिंधुदुर्ग: रविवार असल्याने आंबोलीच्या वर्षा पर्यटनासाठी हजारो पर्यटक मुख्य धबधब्याच्या परिसरात दाखल झाले होते. प्रचंड वाहतूक कोंडी त्यातच पर्यटकांची गर्दी अशातच डिचोली-गोवा येथील पंधरा वर्षीय मुलगी या गर्दीत बेपत्ता झाल्याची घटना रविवारी दुपारच्या सुमारास घडली. मुलीच्या नातेवाइकांनी तत्काळ याबाबत उपस्थित पोलिसांना माहिती दिली.

पोलिसांनी घाट परिसरात शोधाशोध करत अवघ्या अर्ध्या तासात मुख्य धबधब्यापासून जवळच असलेल्या एका छोट्या धबधब्याकडे ती मुलगी आढळून आली. त्यानंतर तिला नातेवाइकांच्या ताब्यात देण्यात आले. आंबोली पोलिसांनी दाखवलेल्या तत्परतेबद्दल त्याचे कौतुक होत आहे.

रविवारी दुपारी २:४५ वाजण्याच्या सुमारास आंबोली पूर्वीचा वस भागात एक कुटुंब आपल्या नातेवाइकांसह वर्षा पर्यटनाचा आनंद घेत होते. यादरम्यान त्यांची १५ वर्षांची मुलगी गर्दीत अचानक बेपत्ता झाली. मुलगी कुठेच सापडत नसल्याने घाबरलेल्या नातेवाइकांनी तातडीने आंबोली पोलिस दूरक्षेत्र गाठून पोलिसांना याबाबत माहिती दिली.

घटनेचे गांभीर्य ओळखून पोलिस निरीक्षक अमोल चव्हाण यांच्या मार्गदर्शनाखाली पोलिस हवालदार मनीष शिंदे, संतोष गलोले आणि गौरव परब यांनी लागलीच शोधमोहीम सुरू केली. रविवारी सुटीचा दिवस असल्याने घाटात पर्यटकांची प्रचंड गर्दी होती. पोलिसांनी वेळ न घालवता घाटातील सर्व गर्दीच्या आणि मुख्य ठिकाणी जाऊन शोध घेतला.

अखेर धबधबा क्रमांक ५ जवळ ही मुलगी पोलिसांना सुखरूप मिळून आली. त्यानंतर कायदेशीर प्रक्रिया पूर्ण करून तिला सुखरूपपणे तिच्या नातेवाइकांच्या ताब्यात देण्यात आले. पोलिसांनी दाखवलेल्या या तत्परतेबद्दल मुलीच्या नातेवाइकांनी आणि पर्यटकांनी पोलिसांचे आभार मानले.