पुणे: खाकीच्या नावाखाली कोटींची लूट उधळली; भाडोत्री कार चालकानेच मित्रांसह रचलेला कट उघड, ३ जण गजाआड

पुणे: बँकेत भरण्यासाठी तब्बल १ कोटी रुपयांची रोख रक्कम घेऊन जाणाऱ्या एका स्टेशनरी व्यावसायिकाला लुटण्याचा धक्कादायक प्रकार पुणे-सातारा रस्त्यावर घडला आहे. नेहमी विश्वासाने भाड्याने घेतल्या जाणाऱ्या कारच्या चालकानेच पैशांचा सुगावा लागताच आपल्या साथीदारांसह हा दरोड्याचा कट रचला होता. 'आम्ही पोलीस आहोत' अशी बतावणी करत फिल्मी स्टाईलने ही रक्कम लुटण्याचा प्रयत्न करण्यात आला. मात्र, नऱ्हे पोलिसांनी तातडीने कारवाई करत या प्रकरणातील तिघांना अटक केली असून, त्यांचे दोन साथीदार सध्या फरार आहेत.

विक्रम विलास चाकणकर (वय ४४), अमेय अरविंद कार्ले (वय ४६) आणि गणेश रमेश कदम (वय ३३, तिघेही रा. धायरी) अशी अटक करण्यात आलेल्या संशयितांची नावे आहेत. याप्रकरणी हर्षवर्धन भूषण पवार (वय ३५, रा. तळेगाव दाभाडे) यांनी नऱ्हे पोलीस ठाण्यात अधिकृत फिर्याद दिली आहे. हा सर्व थरार १८ जुलै २०२६ रोजी दुपारी १ ते २ च्या सुमारास सिंहगड रस्त्यावरील ब्रम्हा हॉटेल ते खेड शिवापूर पोलीस चौकी दरम्यान घडला.

फिर्यादी हर्षवर्धन पवार यांचा स्टेशनरीचा मोठा व्यवसाय असून ते संपूर्ण पुणे शहरात माल पुरवठा करतात. व्यवसायातून जमा झालेली १ कोटी रुपयांची रोख रक्कम बँकेत भरून ती त्यांच्या ट्रस्टच्या खात्यावर ट्रान्सफर करायची होती. यासाठी त्यांनी नेहमीप्रमाणे ओळखीची एक खासगी सॅन्ट्रो कार भाड्याने घेतली. पवार आणि त्यांचे सहकारी किरण आपटे हे नोटांनी भरलेल्या दोन बॅगा घेऊन कारमध्ये बसले. नेहमी विश्वासातील असलेला विक्रम चाकणकर हाच गाडी चालवत होता. मात्र, गाडीत १ कोटी रुपये असल्याची कुणकुण चालकाला लागली होती आणि त्याने आधीच आपल्या साथीदारांसह लुटीचा प्लॅन तयार केला होता.

गाडी नऱ्हे येथील एचडीएफसी बँकेच्या दिशेने जात असताना, वाटेत अचानक दोन मोटारसायकलवरून चौघे जण आले. त्यांनी कार अडवली. संशयित आरोपी अमेय कार्ले हा पवार यांच्या खिडकीजवळ आला आणि त्याने दमदाटी सुरू केली.

"आम्ही पोलीस आहोत, तुम्ही दोन नंबरचा माल घेऊन चालला आहात हे आम्हाला माहित आहे. एवढी रक्कम घेऊन कुठे चालला आहात? गाडी बाजूला घ्या!" अशी धमकी त्याने दिली. या अचानक झालेल्या प्रकारामुळे पवार आणि आपटे प्रचंड घाबरले. याच गोंधळाचा फायदा घेऊन अमेय कार्ले आणि गणेश कदम यांनी कारचा दरवाजा उघडून आत प्रवेश केला आणि पैशांच्या बॅगा खेचण्याचा प्रयत्न सुरू केला.

झटापट सुरू असतानाच, पूर्वनियोजित कटानुसार चालक विक्रम चाकणकर याने गाडी थांबवण्याऐवजी थेट सातारा रोडच्या दिशेने पळवली. गाडीतच आरोपी आणि फिर्यादी यांच्यात जोरदार वाद आणि बोलाचाली झाली. या गोंधळातच विक्रमने कार थेट 'खेड शिवापूर पोलीस चौकी'त नेली, जेणेकरून हा खरोखरचा पोलीस तपास असल्याचा आव आणता येईल.

परंतु, खेड शिवापूर पोलिसांनी जेव्हा गाडीतील सर्वांची सखोल चौकशी केली, तेव्हा पोलिसांना संशय आला. प्राथमिक चौकशीत हा प्रकार नर्हे पोलीस ठाण्याच्या हद्दीत घडल्याचे स्पष्ट झाल्यावर खेड शिवापूर पोलिसांनी तात्काळ नर्हे पोलिसांशी संपर्क साधून त्यांना पाचारण केले.

नऱ्हे पोलिसांकडून गुन्ह्याचा छडा...

नऱ्हे पोलिसांनी घटनास्थळी धाव घेत संशयितांना ताब्यात घेतले आणि त्यांची कसून चौकशी केली. पोलिसांच्या खाकीचा इंगा दाखवताच चालक विक्रम चाकणकर आणि त्याच्या साथीदारांनी गुन्ह्याची कबुली दिली. स्वतः चालकानेच संपत्तीच्या हव्यासापोटी आपल्या ४ साथीदारांना बोलावून हा दरोड्याचा कट रचल्याचे निष्पन्न झाले. पोलिसांनी या प्रकरणी दरोड्याचा प्रयत्न केल्याचा गुन्हा दाखल करून तिघांना बेड्या ठोकल्या आहेत. या गुन्ह्यातील फरार असलेल्या इतर दोन साथीदारांचा शोध घेण्यासाठी पोलिसांची पथके रवाना झाली आहेत. या प्रकरणाचा पुढील तपास पोलीस उपनिरीक्षक विजयसिंह घाडगे करत आहेत.