पुणे: मित्र, बायको अन् नवरा एकाच खोलीत! अनैतिक संबंधाच्या संशयातून मित्राचा काटा काढला, पत्नीच्या मदतीने मृतदेह पोत्यात कोंबून फेकला

पुणे: राज्यात दिवसेंदिवस गुन्हेगारीचं प्रमाण वाढत चाललं आहे. अशातच पुण्यातील शिक्रापूरमधून एक अतिशय धक्कादायक आणि थरारक घटना समोर आली आहे. एकाच खोलीत सोबत राहणाऱ्या मित्रानेच आपल्याच मित्राचा गळा दाबून निर्घृण हत्या केल्याचं उघड झालं आहे. इतकेच नाही तर हत्येचा पुरावा लपवण्यासाठी त्याने आपल्या अवघ्या १९ वर्षांच्या पत्नीची मदत घेतली आणि मृतदेह पोत्यात भरून निर्जन ठिकाणी फेकून दिला. शिक्रापूर पोलिसांनी अवघ्या काही तासांत या गुन्ह्याचा छडा लावत पती-पत्नी दोघांनाही बेड्या ठोकल्या आहेत.

नेमकी घटना काय?
या संपूर्ण धक्कादायक प्रकरणाचा खुलासा २६ जुलै रोजी दुपारी झाला. जेव्हा शिक्रापूर येथील करंजेनगरच्या एका मोकळ्या मैदानात, झुडपांमध्ये पोत्यात भरलेला एक अज्ञात तरुणाचा मृतदेह स्थानिक नागरिकांना आढळून आला. या घटनेनं संपूर्ण परिसरात एकच खळबळ उडाली होती. मृतदेहाची ओळख पटवणं पोलिसांसमोर मोठं आव्हान होतं. शिक्रापूर पोलिसांनी तपासाची चक्रे वेगानं फिरवत सोशल मीडिया आणि गुप्त सूत्रधारांच्या जाळ्याचा वापर केला.

अखेर तो मृतदेह गौरव ऊर्फ अक्षय अशोक वायकर (वय २४, मूळ रा. थेऊर, ता. हवेली) या तरुणाचा असल्याचं निष्पन्न झाले. पोलीस तपासात समोर आलेली माहिती थक्क करणारी होती. मृत गौरव हा करंजेनगर येथे त्याचा मित्र मुकेश विठ्ठल सोनवणे आणि मुकेशची पत्नी जान्हवी अनिल पाटोळे (वय १९) यांच्यासोबत रूममेट म्हणून राहत होता.

अनैतिक संबंधांचा संशय आणि निर्घृण खून
गेल्या काही दिवसांपासून गौरव आणि मुकेश यांच्यात अनैतिक संबंधांच्या संशयावरून कडाक्याचं वाद सुरू असल्याची माहिती पोलिसांना मिळाली. याच संशयाच्या धाग्यावरून पती-पत्नीने मिळून अत्यंत थंड डोक्याने मित्राचा काटा काढण्याचा कट रचला. रुममध्येच गौरवची गळा दाबून हत्या करण्यात आली. त्यानंतर खुनाचा पुरावा नष्ट करण्यासाठी दोघांनी मृतदेह एका पोत्यात भरला आणि करंजेनगर परिसरातील एका निर्जन ठिकाणी व झुडपांमध्ये फेकून दिला.

या प्रकरणाची गंभीरता लक्षात घेता पोलिसांनी तातडीने सूत्रे हलवत मुख्य आरोपी मुकेश विठ्ठल सोनवणे आणि त्याची पत्नी जान्हवी अनिल पाटोळे यांना ताब्यात घेतले. मृत गौरवची आई कांचन अशोक वायकर यांनी दिलेल्या फिर्यादीवरून शिक्रापूर पोलीस ठाण्यात हत्येचा गुन्हा दाखल करण्यात आला असून, पोलिसांनी दोन्ही आरोपींना अटक केली आहे. या घटनेमुळे शिक्रापूरसह संपूर्ण पुणे जिल्ह्यात मोठी खळबळ उडाली असून पोलीस या प्रकरणाचा अधिक तपास करत आहेत.

Disclaimer: या पोस्टमधील माहिती उपलब्ध वृत्तस्रोत व अधिकृत माहितीनुसार प्रकाशित करण्यात आली आहे. तपास किंवा अधिकृत प्रक्रियेनुसार तथ्यांमध्ये बदल होऊ शकतो.
या पोस्टचा उद्देश केवळ माहिती देणे असून अंतिम सत्यता संबंधित शासकीय यंत्रणा व न्यायालयीन प्रक्रियेवर अवलंबून आहे.