पुण्यातील पायल झांबरे आत्महत्या प्रकरण; मृत्यूपूर्वीच्या मेसेजमुळे सासू-सासरे आणि पती अटकेत, खळबळजनक माहिती समोर!

पुण्यातील मुकुंदनगर भागात घडलेल्या बहुचर्चित पायल अक्षय झांबरे आत्महत्या प्रकरणात (Payal Zambre Suicide Case) रोज नवीन आणि धक्कादायक खुलासे समोर येत आहेत. हुंड्यासाठी सुरू असलेल्या टोकाच्या छळाला कंटाळून उच्चशिक्षित विवाहितेने आपले जीवन संपवल्याची ही घटना असून, या प्रकरणात स्वारगेट पोलिसांनी मोठी कारवाई करत मृत पायल हिचे पती, सासू आणि सासरे यांना अटक केली आहे.

लग्नात मोठा खर्च आणि त्यानंतर सुरू झालेला छळ:

पोलिसांनी दिलेल्या माहितीनुसार आणि फिर्यादीनुसार, पायल यांचा विवाह १३ मार्च २०१९ रोजी अक्षय अरविंद झांबरे यांच्याशी झाला होता. लग्नावेळी माहेरच्या कुटुंबीयांनी ५० तोळे सोने, २५ लाख रुपये रोख आणि विवाहासाठी अंदाजे ७० ते ८० लाख रुपये खर्च केला होता. परंतु, लग्नानंतर अवघ्या काही महिन्यांतच सासरच्या मंडळींकडून हुंड्यासाठी आणि प्रत्येक सणाला सोने व पैशांची मागणी करण्यासाठी पायल यांचा मानसिक व शारीरिक छळ सुरू करण्यात आला.

मुलगी झाल्यानंतर या छळामध्ये आणखीच भर पडली. मार्च २०२३ मध्ये पायल यांनी मुलीला जन्म दिला, मात्र 'मुलगा झाला नाही' या कारणावरून रुग्णालयातच त्यांना व त्यांच्या बाळाला स्वीकारण्यास नकार देण्यात आला. या प्रकारानंतर पायल यांना बऱ्याच कालावधीसाठी माहेरी राहावे लागले होते. नातेवाईकांच्या मध्यस्थीनंतर त्या सासरी परतल्या, परंतु सासरच्या लोकांची हुंड्याची लालसा कमी झाली नाही. 'तुला मुलगी झाली आहे, फ्लॅटमध्ये दोरी आहे, ओढणीने पंख्याला लटकून जा,' अशा अत्यंत अपमानास्पद शब्दांत त्यांना टोमणे मारून मानसिक त्रास दिला जात होता, असा गंभीर आरोप माहेरच्या लोकांनी केला आहे. याशिवाय माहेरची जमीन नावावर करण्यासाठीही त्यांच्यावर सतत दबाव टाकला जात होता.

मृत्यूपूर्वीचा अखेरचा संदेश आणि पोलीस कारवाई:

घटनेच्या दिवशी, १ नोव्हेंबर रोजी पायल खेड शिवापूर येथील माहेरी गेल्या होत्या. दिवाळीसाठी सासरच्या मंडळींकडून ५० तोळे ऐवजी ५ तोळे सोन्याचा अतिरिक्त तगादा सुरू असल्याबाबत त्यांनी कुटुंबीयांना सांगितले होते. त्यानंतर त्या सायंकाळी मुकुंदनगर येथील घरी परतल्या. रात्रीच्या सुमारास त्यांनी आपल्या भावाला एक संदेश पाठवला, ज्यामध्ये "माझ्या आत्महत्येला माझी सासू जबाबदार आहे," असा स्पष्ट उल्लेख होता. त्यानंतर त्यांचा फोन बंद लागल्याने संशयावरून माहेरच्या लोकांनी सासरच्या घरी धाव घेतली.

तेथे गेल्यानंतर घराचा ताबा मिळवण्यात अडचणी आल्यामुळे गॅलरीची काच फोडून आत प्रवेश करण्यात आला, जिथे पायल संशयास्पद आणि मृत अवस्थेत आढळल्या. या घटनेमुळे संतप्त झालेल्या नातेवाइकांनी व नागरिकांनी झांबरे पॅलेस परिसरात तोडफोड करत तीव्र संताप व्यक्त केला. याप्रकरणी स्वारगेट पोलिसांनी तत्परता दाखवत पती अक्षय झांबरे याला सुरुवातीला अटक केली, तर तपासात सासूचे नाव समोर आल्यानंतर सासू मंगल अरविंद झांबरे (वय ५८) आणि सासरे अरविंद झांबरे (वय ६५) यांनाही अटक करण्यात आली आहे. प्रथमवर्ग न्यायदंडाधिकारी न्यायालयाने तिन्ही आरोपींना पोलीस कोठडी सुनावली असून पोलीस या प्रकरणाचा अधिक सखोल तपास करत आहेत.