Pune : शाळेत सोडण्याचा बहाणा; पुण्यात अल्पवयीन मुलीवर फॅमिली फ्रेंडचा अत्याचार—डीपी रोडवर कार थांबवून धक्कादायक कृत्य

Pune : शाळेत सोडण्याच्या बहाण्याने अल्पवयीन मुलीला कारमध्ये बसवून निर्जनस्थळी नेऊन तिच्यावर बलात्कार केल्याची धक्कादायक घटना पुणे येथील वारजे माळवाडी परिसरात उघडकीस आली आहे. या प्रकरणी एका व्यक्तीविरुद्ध बलात्कार आणि बालकांचे लैंगिक अत्याचारांपासून संरक्षण कायदा (पोक्सो) अंतर्गत गुन्हा दाखल करण्यात आला आहे. आरोपी हा पीडितेच्या कुटुंबाच्या ओळखीतील असल्याची माहिती पोलिसांनी दिली.

नेमकं काय घडलं?
पोलिसांनी दिलेल्या माहितीनुसार, आरोपीने १८ फेब्रुवारी रोजी सकाळी संबंधित अल्पवयीन मुलीला कारमधून शाळेत सोडतो, असे सांगून सोबत नेले. त्यानंतर कर्वेनगर भागातील डीपी रस्त्याजवळ कार थांबवून त्याने मुलीवर लैंगिक अत्याचार केल्याचा आरोप आहे. हा प्रकार कोणाला सांगितल्यास गंभीर परिणाम भोगावे लागतील, अशी धमकीही त्याने पीडितेला दिल्याचे तक्रारीत नमूद करण्यात आले आहे.

घाबरलेल्या मुलीने आईजवळ मन मोकळं केलं
घटनेनंतर घाबरलेल्या मुलीने आईकडे हा प्रकार सांगितला. त्यानंतर पीडितेच्या आईने वारजे माळवाडी पोलिस ठाण्यात तक्रार दाखल केली. तक्रारीच्या आधारे आरोपीविरुद्ध भारतीय न्याय संहिता; तसेच ‘पोक्सो’ कायद्याच्या अन्वये गुन्हा नोंदवण्यात आला आहे. घटनेचे गांभीर्य लक्षात घेऊन वरिष्ठ पोलिस अधिकाऱ्यांनी घटनास्थळी भेट देऊन तपासाबाबत सूचना दिल्या आहेत. उपनिरीक्षक सचिन तरडे तपास करीत आहेत.

कॉलेज विद्यार्थिनीचा पाठलाग करुन त्रास
दुसरीकडे, पुण्यातच हडपसर परिसरातील एका महाविद्यालयात जाणाऱ्या मुलीचा (वय १७) पाठलाग करून तिला त्रास दिल्याच्या प्रकरणात पोलिसांनी एका तरुणाच्या विरुद्ध गुन्हा दाखल केला आहे. या प्रकरणी सार्थक शिवाजी रुपनर (वय २२, रा. रुपनर वस्ती, लोणी काळभोर) याच्या विरुद्ध हडपसर पोलिस ठाण्यात गुन्हा नोंद करण्यात आला आहे.

काय आहे प्रकरण?
पोलिसांनी दिलेल्या माहितीनुसार, आरोपी काही दिवसांपासून पीडित मुलीचा पाठलाग करत होता. ‘तू मला आवडतेस’ असे सांगत तो वारंवार तिच्याशी संपर्क साधण्याचा प्रयत्न करीत होता; तसेच सार्वजनिक ठिकाणी अडवून तिला त्रास देत असल्याचा आरोप करण्यात आला आहे. त्याच्या सततच्या त्रासामुळे मुलगी मानसिक तणावाखाली होती. अखेर तिने पोलिसांकडे तक्रार दाखल केली.