परभणी: मृत्यूचे सापळे ठरत आहेत महामार्ग! परभणी-पाथरी मार्गावर खड्ड्यांमुळे झालेल्या भीषण अपघातात तरुणाचा जागीच मृत्यू, आई प्रकृती अत्यंत चिंताजनक!

परभणी: मोपेड व रिक्षाच्या समोरासमोर झालेल्या धडकेत मुलाचा जागीच मृत्यू तर आई गंभीर जखमी झाल्याची घटना गुरुवारी सकाळी ७.४५ च्या सुमारास पाथरी-परभणी महामार्गावरील किन्होळा पाटीजवळ घडली. किन्होळानजीक असलेल्या छोट्या पुलावर मोठे भगदाड पडले आहे. यामुळे येथे नेहमीच अपघात होत असून या महामार्गावरील खड्ड्याने पुन्हा एकाचा बळी घेतला आहे.

मानवतकडून परभणीकडे जाणारी मोपेड क्रमांक (एमएच २४ एआर ४६७१) व परभणीहून मानवतकडे जाणारा लोडिंग रिक्षा (क्रमांक एमएच २२ एएन २६९८) यांची समोरासमोर धडक होऊन झालेल्या अपघातात कृष्णा बालाजी पोंदाळ (२२, रा. विश्रामगृहासमोर, मानवत) याचा जागीच मृत्यू झाला तर या अपघातात स्कुटीवरील मयताची आई सारिका बालाजी पोंदाळ (४०) या गंभीर जखमी झाल्या. जखमींना तातडीने रुग्णवाहिकेतून डॉ. सुशील राऊत, चालक भानुदास बारहाते यांनी परभणीच्या खासगी रुग्णालयात दाखल केले. घटनास्थळी परभणी ग्रामीण पोलिस ठाण्याचे पोनि. सुरेश थोरात, सपोनि. तावरे, सुधीर डोंबे, पोलिस नाईक शिंदे यांनी भेट देऊन पंचनामा केला. यावेळी पोलिस पाटील अनंता खरवडे, लक्ष्मण राऊत यांनी मदत केली. अपघातग्रस्त ऑटो पोलिसांनी ठाण्यात नेऊन लावला आहे.

महामार्गाची थातूर-मातूर दुरुस्ती प्रवाशांच्या जीवावर
पाथरी-परभणी महामार्गावरील किन्होळा नजीक असलेल्या छोट्या पुलावर एक मोठे भगदाड पडले आहे. यामुळे या ठिकाणी नेहमीच अपघात होत असून या अपघातात अनेकांना आपला जीव गमवावा लागत आहे. मागील महिन्यात याच ठिकाणी एका स्कॉर्पिओ व ट्रकची खड्ड्यामुळे धडक होऊन या अपघातात पाच जण गंभीर जखमी झाले होते. त्यानंतर या खड्ड्याची थातूर-मातूर दुरुस्ती करण्यात आली होती. परंतु, पुन्हा या ठिकाणी जैसे-थे भगदाड पडल्याने हा अपघात घडल्याचे समजते. महामार्गावरील या खड्ड्याची थातूर-मातूर दुरुस्ती प्रवाशांच्या जीवावर बेतत आहे.