Pune : पुणे ते संभाजीनगर प्रवास होणार सुस्साट! आता फक्त 3 तासांत पोहोचा; जाणून घ्या ‘हा गेमचेंजर प्रकल्प’

Pune : पुणे ते छत्रपती संभाजीनगर दरम्यानचा प्रवास आता अधिक जलद आणि सोपा होणार आहे. एमएसआयडीसीच्या महत्त्वाकांक्षी प्रकल्पामुळे हा प्रवास 8 ते 10 तासांवरून थेट 3 तासांवर येणार असून, या मार्गावरील तसेच इतर महामार्गांवरील वाहतूक कोंडी कमी होणार आहे. राज्यातील दळणवळण व्यवस्थेत मोठा बदल घडवणारा हा उपक्रम विकासाचा नवा मार्ग मोकळा करत आहे.

या महामार्गाचे बांधकाम तीन प्रमुख टप्प्यांत विभागले गेले आहे. पहिल्या टप्प्याचे काम सुरू असून, यात पुणे–शिरूर उड्डाणपुलाचा समावेश आहे. या उड्डाणपुलामुळे पुणे–अहमदनगर महामार्गावरील प्रचंड वाहतूक कोंडी कमी होईल. दुसरा आणि तिसरा टप्पा हे नव्याने बांधण्यात येणाऱ्या ग्रीनफिल्ड महामार्गाशी संबंधित आहेत. शिरूर ते संभाजीनगर हा आधुनिक सहा-पदरी महामार्ग असणार असून, या मार्गात महत्त्वाच्या शहरांना, MIDC क्षेत्रांना आणि औद्योगिक पट्ट्यांना जोडणारे बायपास मार्ग तयार केले जाणार आहेत. त्यामुळे प्रवास तर जलद होईलच, पण मालवाहतुकीसाठीही हा मार्ग महत्त्वाचा ठरणार आहे.

Mumbai : मध्य रेल्वेवर भीषण दुर्घटना; आंदोलनामुळे वाढलेल्या गर्दीत फास्ट लोकलची धडक, तिघांचा मृत्यू

दुसऱ्या टप्प्यासाठी निविदा प्रक्रियेला सुरुवात झाली आहे आणि काम लवकरच सुरू होणार आहे. या संपूर्ण प्रकल्पाचा खर्च सुमारे 22000 कोटींवर जाण्याची शक्यता असून, 2026 च्या सुरूवातीपासून मोठ्या प्रमाणावर काम जोरात सुरू होईल अशी अपेक्षा आहे. हा महामार्ग राज्यासाठी गेमचेंजर ठरणार आहे. यामुळे, मराठवाड्यातील व्यापार, पर्यटन आणि उद्योगांना मोठी चालना मिळणार असून बीड, औरंगाबाद आणि आसपासच्या जिल्ह्यांत गुंतवणुकीची नवीन दालने उघडतील. महाराष्ट्रातील दुर्गम भागांत मोठ्या उद्योजकांचे लक्ष वेधले जाणार आहे. 10 तासांचा खडतर प्रवास केवळ 3 तासांवर येणं हे मराठवाड्याच्या एकूण आर्थिक प्रगतीसाठी अभूतपूर्व पाऊल मानले जात आहे.

दुसरा व तिसरा टप्पा हा सहा-पदरी ग्रीनफिल्ड महामार्गाचा मुख्य भाग असणार आहे. आधुनिक डिझाइन, सुरक्षितता मानकं आणि वेगवान वाहतूक लक्षात घेऊन हा मार्ग विकसित होत आहे. यामुळे दळणवळण सुधारून उद्योग, पर्यटन आणि लॉजिस्टिक नेटवर्क अधिकमजबूत होणार आहे. संभाजीनगरच्या आर्थिक विकासाला यामुळे मोठे पाठबळ मिळेल आणि पुणे–मराठवाडा–विदर्भ या त्रिकोणातील संपर्क आणखी सक्षम होणार आहे.