पुणे-नाशिक रेल्वे मार्गात तिसऱ्यांदा मोठा बदल! 'जीएमआरटी' दुर्बिणीच्या संरक्षणासाठी नवा मार्ग निश्चित, ताशी १६० किमी वेगाने धावणार ट्रेन

पुणे-नाशिक रेल्वे मार्गात महत्वाचा बदल; ताशी १६० किमी वेगाने होणार प्रवास, कसा असेल संपूर्ण लोहमार्ग? ‘जायंट मीटरवेव्ह रेडिओ दुर्बीण’ (GMRT) च्या कामकाजावर कोणताही विपरित परिणाम होऊ नये म्हणून रेल्वे मंत्रालयाने पुणे-नाशिक रेल्वे मार्गात तिसऱ्यांदा मोठा बदल केला आहे. आता हा रेल्वेमार्ग उरळी, वाघोली आणि अहिल्यानगर (अहमदनगर) मार्गे नाशिकपर्यंत जोडला जाणार आहे.

 

 

हा महत्त्वाकांक्षी प्रकल्प तीन टप्प्यांत पूर्ण केला जाणार असून त्यासाठी सुमारे १४ हजार कोटी रुपयांचा खर्च अपेक्षित आहे. पुणे-नाशिक दरम्यान दुहेरी रेल्वेमार्ग उभारण्यात येणार असून या मार्गावर रेल्वे ताशी १६० किलोमीटर वेगाने धावू शकेल, अशी माहिती रेल्वे प्रशासनाकडून देण्यात आली आहे.

जीएमआरटीच्या विरोधामुळे बदलला मार्ग सुरुवातीला पुणे-नाशिक रेल्वेमार्ग जीएमआरटीच्या (GMRT) अतिसंवेदनशील परिसरातून नेण्याचा प्रस्ताव ठेवण्यात आला होता. मात्र, रेल्वेच्या लहरींमुळे दुर्बिणीच्या कामकाजात अडथळे निर्माण होऊ शकतात, या कारणास्तव त्याला तीव्र विरोध झाला. त्यानंतर हा मार्ग बदलून जीएमआरटीपासून सुमारे १२ किलोमीटर अंतरावर नेण्याचा दुसरा प्रस्ताव तयार करण्यात आला. परंतु, त्यानंतरही पुन्हा एकदा मार्गात बदल करण्याचा निर्णय घ्यावा लागला. दरम्यान, पुणे-अहिल्यानगर महामार्गाच्या बाजूने रेल्वेमार्ग उभारण्याचा विचार करण्यात आला होता, मात्र तो पर्याय व्यवहार्य ठरला नाही. अखेर आता उरळी आणि वाघोलीमार्गे नवीन मार्ग निश्चित करण्यात आला आहे.

 

प्रवास होणार अधिक जलद या नव्या आराखड्यानुसार (New Alignment), आता रेल्वेमार्ग जीएमआरटीच्या जवळून जाणार नाही. पुणे आणि नाशिकदरम्यानचा हा नवीन रेल्वेमार्ग अंतिम करण्यात आला असून लवकरच या प्रकल्पाच्या प्रत्यक्ष कामाला सुरुवात होणार आहे. नवीन मार्गामुळे पुणे-नाशिक दरम्यानचा रेल्वे प्रवास अधिक जलद आणि सोयीस्कर होणार असल्याचं रेल्वेमंत्री अश्विनी वैष्णव यांनी सांगितले.

 

सविस्तर वाचा, लिंक कमेंट मध्ये https://punenews24.in/