Pune : दोन कोटींचं लग्न, फॉर्च्युनर आणि 55 तोळे सोने दिलं तरीही छळ; पुण्यात सासऱ्यावर विवाहितेच्या विनयभंगाचा आरोप

Pune : मुलीच्या सुखासाठी बापाने पाण्यासारखा पैसा खर्च केला, तब्बल २ कोटी रुपये खर्च करुण लग्न लावले, हुंड्यात 'फॉर्च्युनर' कार आणि ५५ तोळे सोने दिले; तरीही सासरच्या मंडळींची पैशांची हाव काही केल्या संपली नाही. याच पैशाच्या हव्यासापोटी सुरू झाला २६ वर्षीय तरुणीचा अनन्वित छळ. पुण्यात हुंड्यासाठी एका २६ वर्षीय विवाहितेचा अमानुष छळ केल्याची संतापजनक घटना उघडकीस आली आहे. धक्कादायक बाब म्हणजे, या प्रकरणात सासऱ्यानेच सुनेचा विनयभंग केल्याचा गंभीर आरोपही करण्यात आला आहे. याप्रकरणी विमानतळ पोलीस ठाण्यात पती, सासू-सासरे आणि नणंदेविरुद्ध गुन्हा दाखल करण्यात आला आहे.

मरकळ (ता. खेड) येथील लोखंडे कुटुंबात हा प्रकार घडला आहे. विमानतळ पोलिसांनी दिलेल्या माहितीनुसार, पीडित २६ वर्षीय महिलेने याबाबत तक्रार नोंदवली आहे. त्यावरून पती आदित्य अनिल लोखंडे (वय २८), सासरे अनिल किसन लोखंडे (वय ५३), सासू सुवर्णा अनिल लोखंडे (वय ४८) आणि नणंद समृद्धी अनिल लोखंडे (वय २५) या चौघांविरुद्ध गुन्हा दाखल करण्यात आला आहे.

तक्रारदार महिला आणि आरोपी आदित्य यांचा विवाह २२ ऑगस्ट २०२३ रोजी अत्यंत शाही थाटात पार पडला होता. वधूच्या वडिलांनी आपल्या लेकीला सासरी त्रास होऊ नये म्हणून लग्नात सढळ हाताने खर्च केला होता. यामध्ये तब्बल ५५ तोळे सोने, २ किलो चांदीची भांडी, घरातील महागड्या इलेक्ट्रिक वस्तू आणि 'फॉर्च्युनर' गाडी असा जवळपास २ कोटी रुपयांचा ऐवज हुंडा म्हणून दिला होता. मात्र, लग्नानंतर अवघ्या दोनच महिन्यात सासरच्यांनी आपले खरे रंग दाखवण्यास सुरुवात केली.

Latur : माजी केंद्रीय गृहमंत्री शिवराज पाटील चाकूरकर यांचं निधन;९० व्या वर्षी घेतला अखेरचा श्वास

लग्नानंतर काही दिवसातच पती आदित्यचा वाढदिवस आला. याचे निमित्त साधून सासरच्या मंडळींनी माहेरून आणखी पैसे आणि दागिने आणण्यासाठी विवाहितेचा छळ सुरू केला. वाढदिवसाला सोन्याचे कडे हवे म्हणून तगादा लावला. मुलीचा त्रास कमी व्हावा म्हणून वडिलांनी पुन्हा ४ तोळ्याचे सोन्याचे कडे, २५ हजारांचे घड्याळ आणि वाढदिवसाच्या खर्चासाठी ३५ हजार रुपये रोकड दिली. मात्र, तरी देखील 'आणखी पैसे घेऊन ये' असे म्हणत सासरच्यांनी तिचा शारीरिक आणि मानसिक छळ सुरूच ठेवला.

या प्रकरणात सर्वात धक्कादायक बाब म्हणजे, पैशांच्या लोभापायी सासरच्यांनी माणुसकी सोडलीच, पण सासऱ्याने नात्याला काळीमा फासणारे कृत्य केले. सासरे अनिल लोखंडे यांनी आपला विनयभंग केल्याचा आरोप पीडितेने तक्रारीत केला आहे. अखेर सततच्या जाचाला आणि अपमानाला कंटाळून पीडितेने पोलिसांत धाव घेतली. विमानतळ पोलीस या प्रकरणाचा अधिक तपास करत आहेत.