Pune : आळंदीत थरारक दुहेरी हत्येचा उलगडा; आरोपीने थंड डोक्याने चिमुकली आणि वृद्धेची केली हत्या, तपासात उलगडा

Pimpri-Chinchwad : आळंदी परिसरात घडलेल्या दुहेरी हत्याकांडाने संपूर्ण शहर हादरले आहे. सहा वर्षीय धनश्री केदारी आणि ७० वर्षीय मंगल शिंदे यांच्या निर्घृण हत्येमुळे परिसरात भीती आणि हळहळ व्यक्त होत आहे. या प्रकरणाचा पिंपरी-चिंचवड गुन्हे शाखेने अवघ्या काही तासांत उलगडा करत आरोपीला अटक केली आहे.

गुरुवारी सकाळी ही घटना उघडकीस येताच पोलिसांनी तात्काळ घटनास्थळी धाव घेत तपास सुरू केला. तपासाची चक्रे वेगाने फिरवत गुन्हे शाखेच्या युनिट तीनने आरोपीचा माग काढत आळेफाटा येथून त्याला अटक केली. विनायक तुकाराम भवारी (वय ३१) असे अटक करण्यात आलेल्या आरोपीचे नाव असून तो मृत चिमुकली धनश्रीचा नात्याने आजोबा असल्याचे समोर आले आहे.

नेमकं काय घडलं?
तपासानुसार, बुधवारी रात्री आरोपी घरात आला. तो संगीता केदारी यांचा पती असल्याने घरातील व्यक्तींना परिचित होता. त्या वेळी धनश्री आणि मंगल शिंदे घरात झोपल्या होत्या, तर संगीता केदारी या नाईट ड्युटीसाठी रुग्णालयात होत्या.

आरोपीने काही वेळ दोघींशी संवाद साधल्यानंतर संशयाच्या भरात संताप व्यक्त केला. मंगल शिंदे या आपल्या विरोधात भडकवत असल्याचा संशय त्याच्या मनात होता. याच रागातून त्याने प्रथम मंगल शिंदे यांचे डोके भिंतीवर आपटून त्यांची हत्या केली. त्यानंतर सहा वर्षीय धनश्रीचा उशीने तोंड दाबून खून केल्याचे तपासात निष्पन्न झाले आहे.

आरोपीला कशी अटक झाली?
घटनेनंतर आरोपी आळेफाटा येथे पळून गेला होता. मात्र, गुन्हे शाखा युनिट तीनचे पोलीस निरीक्षक कसबे यांच्या मार्गदर्शनाखाली पोलीस उपनिरीक्षक भरत गोसावी यांच्या पथकाने अचूक माहितीच्या आधारे सापळा रचून त्याला अटक केली.

दरम्यान, संगीता केदारी आणि आरोपी यांचा दोन वर्षांपूर्वी सोशल मीडियावर परिचय होऊन प्रेमविवाह झाला होता. काही काळापासून त्यांच्यात मतभेद निर्माण झाल्याने आरोपी वेगळा राहत होता. मंगल शिंदे या शेजारी असून आरोपीबद्दल नकारात्मक बोलत असल्याचा संशय त्याच्या मनात होता.

या दुहेरी हत्याकांडामुळे आळंदी परिसरात भीतीचे वातावरण निर्माण झाले असून पोलीस या प्रकरणाचा अधिक तपास करत आहेत.