Pune Accident : बेशिस्त बाईकचालकांचा उच्छाद, भरधाव बाईकच्या धडकेत महिलेचा मृत्यू; अपघाताचा थरार CCTVमध्ये कैद

Pune Accident : पुणे शहरात कर्वेनगर परिसर व उपनगरामध्ये अल्पवयीन मुलांकडून बेफाम पद्धतीने गाड्या चालवल्या जातात. बाईकचालकांचा हा उच्छाद एका महिलेच्या जीवावर बेतला आहे.

भरधाव बाईकच्या धडकेनंतर महिलेचा याउपचारादरम्यान मृत्यू झाला आहे. बाईकच्या धडकेचा हा सर्व प्रकार सीसीटीव्ही कॅमेऱ्यात कैद झाला आहे. याप्रकरणी पोलिसांकडून युवकावर कारवाई करण्यात आली.

काही दिवसांपूर्वीच कर्वेनगर परिसरात श्रीकृष्ण मित्र मंडळाच्या बरोबर समोर ही अपघाताची घटना घडली होती. श्रीकृष्ण मित्र मंडळाचे सामाजिक कार्यकर्ते माननीय समीर वसवे यांच्या मातोश्री रंजना प्रकाश वसवे यांना एका बाईकचालकाने जोरदार धडक दिली होती. त्यानंतर त्यांना तातडीने जवळी रुग्णालयात दाखल करण्यात आले होते. मात्र उपचारादरम्यान त्यांचा मृत्यू झाला आहे.

कर्वेनगर हिंगणे होम कॉलनीमध्ये बेफामपणे गाडी चालवणारे, सायलेन्सर व कर्णकर्कश हॉर्नमधून आवाज काढणाऱ्यांचं प्रमाण दिवसेदिवस वाढत आहे. याचा नाहक त्रास स्थानिक नागरिकांना सहन करावा लागत आहे. याच्यावर उपाययोजना करणे फार गरजेचे आहे, असं रहिवाशांचं म्हणणं आहे.

भविष्यात अशा प्रकारचे अपघात टाळण्यासाठी जनजागृती करणे, ठिकठिकाणी बोर्ड बॅनर लावणे गरजेचं आहे. महत्त्वाच्या ठिकाणी स्पीड ब्रेकर तयार करणे सुरक्षिततेच्या दृष्टीने अत्यंत गरजेचे आहे, अशी मागणी केली जात आहे.