पुणे हादरलं! लग्नासाठी प्रियकराचं भररस्त्यातून अपहरण; तरुणीसह ७ साथीदारांना बेड्या!

पुण्यामध्ये एक अत्यंत थरारक आणि धक्कादायक प्रकार उघडकीस आला आहे. एका २७ वर्षीय तरुणीने लग्नासाठी आपल्या प्रियकराचे अपहरण केल्याचा धक्कादायक प्रकार समोर आला आहे. या घटनेनंतर पुणे पोलिसांनी थेट बीड जिल्हा गाठून या 'लेडी डॉन'सह तिच्या सात साथीदारांना अटक केली आहे.

मिळालेल्या माहितीनुसार, आरोपी तरुणी आणि नीलेश बोद्रे यांची आधीपासून मैत्री होती. तरुणीची नीलेशसोबत लग्न करण्याची तीव्र इच्छा होती, मात्र नीलेश या लग्नासाठी अजिबात तयार नव्हता. नीलेश लग्नास नकार देत असल्याने, या तरुणीने आपल्या सात साथीदारांना गोळा केले आणि त्याच्या अपहरणाचा कट रचला.

हा प्रकार पुणे-अहिल्यानगर रस्त्यावरील एका पेट्रोल पंपाजवळ घडला. २७ मे रोजी रात्री ९ वाजण्याच्या सुमारास नीलेशला काही जणांनी रस्त्यात अडवले. त्याला बेदम मारहाण करत एका भाड्याच्या टुरिस्ट गाडीत बळजबरीने कोंडून पळवून नेले. या घटनेची माहिती मिळताच लोणीकंद पोलिसांनी तातडीने तपास सुरू केला. पोलिसांनी सीसीटीव्ही फुटेजच्या मदतीने गाडीचा क्रमांक मिळवला आणि आरोपींचा पाठलाग केला. आरोपी बीड जिल्ह्यातील माजलगाव येथे पोहोचले असता, पोलिसांनी स्थानिक पोलिसांच्या मदतीने तिथे धाड टाकून नीलेश बोद्रे याची सुखरूप सुटका केली.

पोलिसांनी या प्रकरणात तरुणीसह सुदाम ताठे, शेख सोहेल, देविदास पांजगे, वैभव शेळके, प्रसाद गवळी आणि सारंग काकडे या सात आरोपींना अटक केली आहे. सर्वांना न्यायालयात हजर केले असता, न्यायालयाने त्यांना पोलीस कोठडी सुनावली आहे. लग्नासाठी थेट तरुणाचेच अपहरण करण्याच्या या अजब गुन्ह्यामुळे संपूर्ण पुणे आणि बीड जिल्ह्यात मोठी खळबळ उडाली आहे.