महामार्गावर रक्तरंजित थरार! शेतीच्या वादातून तरुणाकडून मावस भावावर कोयत्याने सपासप वार!

छत्रपती संभाजीनगर जिल्ह्यातील पैठण तालुक्यात कौटुंबिक आणि शेतीच्या जुन्या वादातून एका तरुणाने आपल्या मावस भावावर कोयत्याने जीवघेणा हल्ला केल्याची धक्कादायक घटना समोर आली आहे. ही घटना बिडकीन ते फारोळा गावानजिक महामार्गावरील पुलाजवळ घडली.

मिळालेल्या माहितीनुसार, शेतीच्या जुन्या वादातून मावस भावांमध्ये जोरदार वाद झाला होता. हा वाद विकोपाला गेल्याने एका भावाने दुसऱ्या भावावर थेट कोयत्याने हल्ला केला. या हल्ल्यात फुलंब्री तालुक्यातील गणोरी गावचे रहिवासी रामेश्वर हरिश्चंद्र लव्हाळे (वय ४०) हे गंभीर जखमी झाले आहेत. आरोपीने त्यांच्या पायावर कोयत्याने वार केल्यामुळे त्यांना मोठी दुखापत झाली आहे.

भरदिवसा महामार्गालगत घडलेल्या या हिंसक घटनेमुळे परिसरात काही काळ तणावाचे वातावरण निर्माण झाले होते. घटनेची माहिती मिळताच पोलिसांनी घटनास्थळी धाव घेतली. जखमी रामेश्वर लव्हाळे यांना उपचारासाठी तातडीने बिडकीन येथील ग्रामीण रुग्णालयात दाखल करण्यात आले आहे. याप्रकरणी पोलिसांनी गुन्हा दाखल केला असून, पुढील तपास सुरू आहे.