फलटण हादरले! भूतबाधेची भीती अन् जादूटोण्याचा बनाव रचून १४ वर्षीय अल्पवयीन मुलीवर लैंगिक अत्याचार; पोक्सोसह गंभीर गुन्हे दाखल!

फलटण (सातारा) : सातारा जिल्ह्यातील फलटण तालुक्यातून एक अत्यंत संतापजनक आणि काळीज पिळवटून टाकणारी घटना समोर आली आहे. अंधश्रद्धेचा आणि जादूटोण्याचा भयानक गैरवापर करत एका १४ वर्षीय अल्पवयीन मुलीला अंगात भूत शिरल्याची खोटी भीती दाखवली गेली. या भितीचा गैरफायदा घेत नराधमाने जादूटोण्याचा बनाव रचून तिच्यावर वेळोवेळी अकुप्रकार आणि लैंगिक अत्याचार केल्याची अत्यंत खळबळजनक घटना उघडकीस आली आहे. या घटनेमुळे फलटण परिसरात व संपूर्ण सातारा जिल्ह्यात तीव्र संताप व्यक्त केला जात आहे.

या प्रकरणी मिळालेल्या सविस्तर माहितीनुसार, पीडित १४ वर्षीय अल्पवयीन मुलीच्या आईने यासंदर्भात फलटण पोलिसांत जाऊन सविस्तर फिर्याद नोंदवली आहे. या फिर्यादीच्या आधारे पोलिसांनी आरोपी सौरभ नाना मदने याच्याविरोधात अत्यंत कडक कलमांखाली गुन्हा दाखल केला आहे. आरोपीने सुरुवातीला पीडित मुलीच्या मनात अंगात भूत आल्याची किंवा वाईट शक्तींचा वास असल्याची अंधश्रद्ध भीती निर्माण केली. त्यानंतर त्या भीतीचा फायदा घेत विविध जादूटोण्याच्या आणि मंत्रतंत्राच्या विधींचा बनाव रचला. या भितीच्या सावलीखाली आरोपीने बळजोरी करत व धमकावून या अल्पवयीन मुलीवर वेळोवेळी लांछनास्पद व शारीरिक अत्याचार केले.

जेव्हा पीडित मुलीने हा सर्व प्रकार आणि तिच्यावर झालेला अत्याचार अत्यंत धसक्याने व धास्तावलेल्या अवस्थेत आपल्या कुटुंबियांना सांगितला, तेव्हा संपूर्ण कुटुंबाच्या पायाखालची वाळू सरकली. याप्रकरणी तातडीने पावले उचलत पीडित मुलीच्या पालकांनी पोलिसांत धाव घेत तक्रार दाखल केली. पोलिसांनी घटनेचे गांभीर्य लक्षात घेऊन आरोपी सौरभ नाना मदने याच्याविरुद्ध बालकांचे लैंगिक अपराधांपासून संरक्षण कायदा म्हणजेच 'पोक्सो कायदा' (POCSO Act), महाराष्ट्र नरबळी आणि इतर अमानुष, अनिष्ठ व अघोरी प्रथा व जादूटोना कायदा तसेच भारतीय न्याय संहितेच्या (BNS) विविध गंभीर कलमांन्वये गुन्हा दाखल केला आहे.

सध्या फलटण पोलीस उपविभागीय अधिकारी आणि स्थानिक पोलीस स्टेशनचे अधिकारी या प्रकरणाचा अतिशय सखोल तपास करत आहेत. अंधश्रद्धेचा असा भयंकर वापर करून एका निष्पाप अल्पवयीन मुलीचे आयुष्य उद्ध्वस्त करणाऱ्या नराधमाला लवकरात लवकर कठोर शिक्षा व्हावी, अशी मागणी संतप्त नागरिक व सामाजिक संघटनांकडून केली जात आहे. पोलीस या प्रकरणातील इतर काही जण किंवा अंधश्रद्धेचे जाळे पसरवणारे अन्य कोणी मागे आहेत का, याचाही कसून शोध घेत आहेत.