Minor Girl Blackmailed and Defamed After Refusing Sexual Demands

भंडारा: जिल्ह्यात एका १५ वर्षांच्या अल्पवयीन शाळकरी मुलीला प्रेमाच्या जाळ्यात ओढून, तिच्या असहायतेचा गैरफायदा घेत तिचा आक्षेपार्ह व्हिडिओ तयार केल्याची संतापजनक घटना समोर आली आहे. या व्हिडिओच्या आधारे मुलीकडे शरीरसुखाची मागणी करण्यात आली, मात्र मुलीने या नराधमांना ठामपणे विरोध केला. यामुळे चिडलेल्या आरोपींनी तो व्हिडिओ सोशल मीडियावर व्हायरल करून तिची बदनामी केली. या घटनेमुळे संपूर्ण जिल्हा सुन्न झाला असून, गोबरवाही पोलिसांनी पाच आरोपींविरुद्ध पोक्सो (POCSO) आणि भारतीय न्याय संहितेअंतर्गत गुन्हा दाखल केला आहे.

नेमकी घटना काय?
गोबरवाही पोलीस ठाण्याच्या हद्दीतील एका गावात राहणाऱ्या १५ वर्षीय पीडित मुलीला, आरोपी भावेश यादव (वय १९, रा. सिंडीकेट कॅम्प, डोंगरी माईन्स) याने ती अल्पवयीन असल्याचे माहीत असतानाही प्रेमाचे आमिष दाखवून जाळ्यात ओढले. २४ एप्रिल २०२६ च्या मध्यरात्री भावेश पीडितेच्या घरी गेला. ते दोघे बेडरूममध्ये असतानाच, आधीच दबा धरून बसलेले त्याचे मित्र क्षितिज पटले (वय १९, रा. डोंगरी बुज), बाल्या उर्फ करण चौधरी (वय २१) आणि इतर दोन अल्पवयीन मुले अचानक बेडरूममध्ये शिरली. यावेळी क्षितिज पटले याने आपल्या मोबाईलमध्ये त्या दोघांचा आक्षेपार्ह व्हिडिओ शूट केला.

नकार दिल्याने व्हिडिओ केला व्हायरल
व्हिडिओ काढल्यानंतर आरोपींनी पीडित मुलीला गाठून तिला धमकावले आणि शरीरसुखाची मागणी केली. मात्र, पीडितेने धैर्य दाखवत त्यांच्या या अनैतिक मागणीला स्पष्ट नकार दिला. आपली इच्छा पूर्ण होत नसल्याचे पाहून संतापलेल्या या नराधमांनी तो आक्षेपार्ह व्हिडिओ सोशल मीडियावर व्हायरल केला.

व्हिडिओ व्हायरल झाल्याचे समजताच पीडित मुलगी हादरून गेली. तिने हिंमत एकवटून गोबरवाही पोलीस ठाणे गाठून तक्रार दिली. प्रकरणाचे गांभीर्य ओळखून गोबरवाहीचे ठाणेदार शरद शेवाळे यांच्या मार्गदर्शनाखाली पोलिसांनी कारवाई करत पाचही आरोपींना ताब्यात घेतले आहे. यामध्ये तीन सज्ञान आणि दोन अल्पवयीन मुलांचा समावेश आहे.