बारामती: पुण्यात भीषण अपघातात बोडरे कुटुंबातील तीनही भावंडांचा दुर्दैवी अंत

बारामती: पुणे जिल्ह्यातील बारामती तालुक्यात एकाच कुटुंबातील तीन सख्या भावंडांचा भीषण अपघातात मृत्यू झाल्याची हृदयद्रावक घटना समोर आली आहे. निरा–मोरगाव राज्य मार्गावरील चौधरवाडी फाटा येथे शनिवारी (दि. ६ जून) सायंकाळी झालेल्या अपघातात दोन बहिणींचा जागीच मृत्यू झाला होता, तर सोमवारी रात्री उपचारादरम्यान त्यांच्या लहान भावाचीही मृत्यूशी झुंज अपयशी ठरली. या घटनेने मुरूम (ता. फलटण) येथील बोडरे कुटुंबावर दुःखाचा डोंगर कोसळला असून, संपूर्ण परिसरात हळहळ व्यक्त होत आहे.

नेमकी घटना काय?
मुरूम येथील रहिवासी सेजल ज्ञानेश्वर बोडरे (वय १७), अक्षरा ज्ञानेश्वर बोडरे (वय १५) आणि त्यांचा धाकटा भाऊ पवन ज्ञानेश्वर बोडरे (वय १२) हे तिघे शनिवारी इलेक्ट्रिक स्कुटीवरून बारामती तालुक्यातील मुर्टी येथे आपल्या मामाच्या गावाला निघाले होते. चौधरवाडी फाट्याजवळ पोहोचले असता, समोरून येणाऱ्या आयशर टेम्पोची त्यांच्या स्कुटीला भीषण धडक झाली.

 

तीनही भावंडांचे निधन
या भीषण धडकेत सेजल आणि अक्षरा या दोन्ही बहिणींचा घटनास्थळीच मृत्यू झाला. त्यांचा भाऊ पवन गंभीर जखमी झाला होता. त्याला तातडीने बारामती येथील रुग्णालयात दाखल करण्यात आले होते, परंतु प्रकृती चिंताजनक असल्याने पुढील उपचारासाठी त्याला पुण्याला हलविण्यात आले. मात्र, मंगळवारी (दि. ९ जून) मध्यरात्री १.३० वाजताच्या सुमारास उपचारादरम्यान पवनचेही निधन झाले.

गावात शोककळा
रविवारी दुपारी सेजल आणि अक्षरा यांच्यावर मुरूम गावातील स्मशानभूमीत शोकाकुल वातावरणात अंत्यसंस्कार करण्यात आले होते. त्यानंतर पवनच्याही निधनाची बातमी गावात पोहोचताच पुन्हा एकदा शोककळा पसरली. पवन अभ्यासात हुशार आणि सर्वांचा लाडका होता. या दुर्दैवी अपघाताने एकाच घरातील तीन तरुण जीव गेल्याने बोडरे कुटुंबाचे आयुष्य पूर्णपणे उध्वस्त झाले आहे. तीन निष्पाप जीवांच्या निधनाने संपूर्ण बारामती आणि फलटण तालुके सुन्न झाले आहेत.