Nashik : अशोक खरात प्रकरण, देवदर्शन बुकिंगच्या बहाण्याने आधार-पॅन घेत बनावट बँक खाते उघडल्याचा धक्कादायक खुलासा

Nashik : भोंदूबाबा अशोक खरात उर्फ ‘कॅप्टन’ याच्या फसवणूक प्रकरणात नवे धक्कादायक तपशील समोर आले आहेत. देवदर्शनाच्या नावाखाली लोकांची माहिती मिळवून मुंबईतील व्यावसायिकाच्या नावाने बनावट बँक खाते उघडत कोट्यवधींचे गैरव्यवहार केल्याचा आरोप उघड झाला आहे.

पुण्यातील बांधकाम व्यावसायिकाला पूजाविधी व परदेश दौऱ्याचे आमिष दाखवून फसवणूक केल्यानंतर, खरातच्या आर्थिक व्यवहारांचा तपास सुरू असताना हे प्रकरण समोर आले. अहिल्यानगर जिल्ह्यातील राहाता पोलिस ठाण्यात खरातसह समता पतसंस्थेच्या तत्कालीन व्यवस्थापकाविरुद्ध गुन्हा नोंद करण्यात आला असून, संबंधित पतसंस्थेतील सर्व खात्यांची पडताळणी सुरू आहे.

तपासादरम्यान काही खातेधारकांना पोलिसांनी नोटिसा बजावल्यानंतर, मुंबईतील हॉटेल व्यावसायिक दिनेश परब यांच्या नावाने बनावट खाते उघडल्याचे उघड झाले. देवदर्शनासाठी बुकिंग करण्याच्या बहाण्याने खरातने परब दाम्पत्याचे आधारकार्ड, पॅनकार्ड आणि फोटो घेतले होते. त्याच कागदपत्रांचा गैरवापर करून ही ठकबाजी करण्यात आल्याचा संशय आहे.

दरम्यान, अशोक खरातविरुद्ध नाशिकमधील सरकारवाडा पोलिस ठाण्यात एकूण ११ गुन्हे नोंद असून, त्यात लैंगिक अत्याचार, खंडणी आणि फसवणुकीच्या गुन्ह्यांचा समावेश आहे. याशिवाय शिर्डी आणि राहाता येथेही स्वतंत्र गुन्हे दाखल आहेत. एकूण गुन्ह्यांची संख्या १३ वर पोहोचली आहे.

या प्रकरणाचा तपास सध्या वेगाने सुरू असून, विशेष तपास पथक (SIT) तसेच शिर्डी पोलिसांकडून आर्थिक व्यवहारांची सखोल चौकशी केली जात आहे. संशयितांची धरपकड सुरू असून, सावकारी प्रकरणात काही जणांना अटकही करण्यात आली आहे. खरातच्या संपूर्ण आर्थिक जाळ्याचा उलगडा करण्यावर तपास यंत्रणांचा भर आहे.