Nagpur News : धावत्या रेल्वेत ९ वर्षीय चिमुकलीवर अत्याचाराचा प्रयत्न; संतप्त प्रवाशांकडून कोच अटेंडेंटला चोप

Nagpur News : नागपूर शहरातून एक संतापजनक घटना समोर आली आहे. धावत्या रेल्वेत कोच अटेंडेंटने एका ९ वर्षीय चिमुकलीवर अत्याचार करण्याचा प्रयत्न केला. सोमवारी (१५ जानेवारी) रात्रीच्या सुमारास बुटीबोरी दरम्यान हा प्रकार घडला. चिमुकलीने रडत रडत घटनेची माहिती आईला दिली. त्यानंतर प्रवाशांनी कोच अटेंडेंटला चांगलाच चोप दिला.

याप्रकरणी पीडित मुलीच्या आईने फिर्याद दिल्यानंतर नागपूर   लोहमार्ग पोलीस निरीक्षक मनीषा काशीद यांनी तातडीने तपासाची चक्रे फिरवत आरोपीला अटक केली. मुन्ना (50 वर्ष) असं आरोपी कोच अटेंडेंटचे नाव आहे. त्याच्यावर पोस्को कायदाअंतर्गत गुन्हा दाखल करण्यात आला आहे.

Solapur News : सोलापुरात अजितदादांची ताकद वाढली; ४ बड्या नेत्यांनी सोडली शरद पवारांची साथ

मिळालेल्या माहितीनुसार, ९ वर्षीय चिमुकली आपल्या आई आणि आजीसोबत पाटलीपुत्र एक्सप्रेसमधून प्रवास करीत होती. याच एक्सप्रेसमध्ये आरोपी कोच अटेंडेंट म्हणून काम पाहत होता. सोमवारी मध्यरात्री दीड वाजेच्या सुमारास एक्सप्रेस बुटीबोरी दरम्यान पोहोचली.

दरम्यान, चिमुकली वॉशरुमसाठी गेली असता, आरोपीची वाईट नजर तिच्यावर पडली. त्याने चिमुकलीचा पाठलाग करत शौचालयात घुसून तिच्यावर अतिप्रसंग करण्याचा प्रयत्न केला. मात्र, चिमुकलीने आरडाओरड करत आईकडे धाव घेतली.

आईने विचारपूस केली असता, आपल्यासोबत घडलेला प्रकार चिमुकलीने कथन केला. धावत्या ट्रेनमध्ये चिमुकलीवर अत्याचार करण्याचा प्रयत्न झाल्याचं कळताच प्रवासी चांगलेच संतापले. त्यांनी आरोपीला बेदम चोप देत पोलिसांच्या स्वाधीन केलं. या घटनेमुळे पुन्हा महिला तसेच मुलींचा सुरक्षेचा प्रश्न ऐरणीवर आला आहे.