Nagpur : 28 वर्षीय विवाहित कबड्डीपटूची आत्महत्या; स्वप्नीलचे चॅट्स उघडकीस, पती फरार—महाराष्ट्र हादरला

Nagpur : महिला कबड्डीपटूने कीटकनाशक प्राशन करुन आत्महत्या केल्याची हृदयद्रावक घटना नागपूरच्या सावनेर तालुक्यातील माळेगाव टाऊन येथे राहणाऱ्या घडली आहे. आर्थिक अडचणी, नोकरीचे आमिष दाखवून केलेली फसवणूक आणि लग्नानंतर वाढलेला मानसिक छळ यामुळे कंटाळून तिने टोकाचा निर्णय घेतल्याची प्राथमिक माहिती समोर आली आहे. २८ वर्षीय किरण सूरज दाढे असे आत्महत्या केलेल्या महिला कबड्डीपटूचे नाव आहे. या प्रकरणी सावनेर पोलिसांनी तिचा पती स्वप्निल जयदेव लांबघरे याच्याविरोधात गुन्हा दाखल केला असून तो सध्या फरार आहे.

मिळालेल्या माहितीनुसार, आर्थिक परिस्थिती हलाखीचीअसल्याने कबड्डीपटू किरणला नोकरीचीआवश्यकता होती. याच संधीचा फायदा घेत स्वप्निलने तिला वेकोलीत नोकरी लावून देण्याचे आमिष दाखवले. या विश्वासावर २०२० साली नोंदणी पद्धतीने दोघांचे लग्न झाले. मात्र लग्नानंतरही किरण माहेरीच राहत होती. नोकरी लावून देण्याबाबत स्वप्निल सतत टाळाटाळ करत होता. उलट नातेसंबंधासाठी दबाव, शिवीगाळ आणि धमक्यांमुळे तिचा मानसिक त्रास वाढत गेला.

Nagpur : ‘लाडकी बहीण’ योजनेवरून विधानसभेत चर्चेची खळबळ; फडणवीसांनी आमदारांना सुनावलं

नोकरी तर दूरच, स्वप्निलकडून सतत होणाऱ्या त्रासामुळे किरणने कुटुंब न्यायालयात धाव घेत घटस्फोटासाठी याचिकाही दाखल केली होती. तरीही छळ थांबला नाही, अशी माहिती कुटुंबीयांनी दिली. वाढत्या मानसिक तणावाला कंटाळून ४ डिसेंबर रोजी सकाळी साडेआठ वाजताच्या सुमारास किरणने कीटकनाशक प्राशन केले. प्रकृती गंभीर झाल्याने तिला तत्काळ नागपूर मेडिकल कॉलेज रुग्णालयात दाखल करण्यात आले. मात्र उपचार सुरू असतानाच ७ डिसेंबर रोजी तिचा मृत्यू झाला.

किरणने मृत्यूपूर्वी स्वप्निलकडून होत असलेल्या त्रासासंबंधीचे मोबाईलवरील संदेश आणि चॅट्स पुराव्यासाठी जतन करून ठेवले होते, अशी माहिती पोलिसांना मिळाली आहे. याच पुराव्यांच्या आधारे सावनेर पोलिसांनी स्वप्निल लांबघरे याच्याविरोधात फसवणूक, मानसिक छळ आणि आत्महत्येस प्रवृत्त केल्याप्रकरणी गुन्हा दाखल केला आहे. गुन्हा दाखल होताच स्वप्निल फरार झाला असून त्याचा शोध घेण्यासाठी विशेष पथक तयार करण्यात आले आहे.

या घटनेमुळे सावनेर परिसरात तसेच क्रीडा विश्वात तीव्र हळहळ व्यक्त होत आहे. एक हुशार कबड्डीपटू अशा प्रकारे आत्महत्येस प्रवृत्त होणे हे समाजासाठी चिंताजनक असल्याची प्रतिक्रिया नागरिकांतून उमटत आहे. पोलिस पुढील तपास करत असून आरोपीला लवकरच अटक करण्यात येईल, असा विश्वास व्यक्त करण्यात येत आहे.