9 जागांसाठी लवकरच निवडणूक जाहीर होण्याची शक्यता; महायुती-मविआमध्ये जागावाटपाची रणनिती चर्चेत

Mumbai : महाराष्ट्र विधान परिषदेतील 9 सदस्यांचा कार्यकाळ 13 मे रोजी संपत असल्याने या जागांसाठी पुढील आठवड्यात निवडणूक जाहीर होण्याची शक्यता वर्तवली जात आहे. विधानसभेतील सध्याच्या संख्याबळानुसार महायुतीला स्पष्ट आघाडी मिळण्याची शक्यता असून जागावाटपावर राजकीय वर्तुळात चर्चा सुरू आहे.

 

सध्याच्या समीकरणांनुसार भाजपला 5, शिवसेना (शिंदे गट) 2, राष्ट्रवादी (अजित पवार गट) 1 आणि महाविकास आघाडीला 1 जागा मिळण्याची शक्यता व्यक्त केली जात आहे. मात्र राष्ट्रवादीकडे अतिरिक्त मतं असल्याने महायुतीने अधिक उमेदवार दिल्यास निवडणूक बिनविरोध होण्याची शक्यता कमी मानली जात आहे.

विधान परिषदेतील एका उमेदवाराच्या विजयासाठी 28 मतांचा कोटा आवश्यक आहे. विद्यमान विधानसभेतील आकडेवारी पाहता महायुतीचे 8 उमेदवार सहज निवडून येऊ शकतात, तर महाविकास आघाडीला एका जागेवर निश्चित यश मिळण्याची शक्यता आहे. दुसऱ्या जागेसाठी मात्र अतिरिक्त मतांची जुळवाजुळव करावी लागणार आहे.

निवृत्त होणारे आमदार (9 जागा):
उद्धव ठाकरे, नीलम गोऱ्हे, शशिकांत शिंदे, अमोल मिटकरी, गोपीचंद पडळकर, रणजितसिंह मोहिते-पाटील, राजेश राठोड, प्रवीण दटके, रमेश कराड

दरम्यान, भाजपमध्ये इच्छुकांची मोठी गर्दी असून राज्यसभा निवडणुकीत संधी न मिळालेल्या नेत्यांनी विधान परिषदेसाठी तयारी सुरू केली आहे. पक्षांतर्गत उमेदवारीसाठी चुरस वाढल्याचे चित्र आहे.

विधान परिषदेच्या 17 रिक्त जागांवरही लवकरच निवडणूक?
स्थानिक स्वराज्य संस्थांच्या निवडणुका पार पडल्यानंतर दीर्घकाळ रिक्त असलेल्या 17 विधान परिषद जागांसाठीही प्रक्रिया सुरू होण्याची शक्यता आहे. याबाबतचा अहवाल केंद्रीय निवडणूक आयोगाकडे पाठवला जाणार असल्याची माहिती आहे.

संभाव्य मतदारसंघ :
सोलापूर, अहिल्यानगर, ठाणे, जळगाव, सांगली-सातारा, नांदेड, यवतमाळ, पुणे, भंडारा-गोंदिया, रायगड-रत्नागिरी-सिंधुदुर्ग, नाशिक, वर्धा-चंद्रपूर-गडचिरोली, अमरावती, धाराशिव-लातूर-बीड, परभणी-हिंगोली, छत्रपती संभाजीनगर-जालना, नागपूर.

भाजपमधील चर्चेतील नावे :
केशव उपाध्ये, माधवी नाईक, रणजीतसिंह निंबाळकर, राम सातपुते यांसारखी नावे चर्चेत असून विद्यमान काही आमदार निवृत्त होत असल्याने पक्ष कोणाला पुन्हा संधी देतो किंवा नव्या चेहऱ्यांना प्राधान्य देतो याकडे लक्ष लागले आहे.