Mumbai :माटुंगा वर्कशॉपमध्ये उभ्या ट्रेनच्या डब्यांना आग; परिसरात घबराट, सुदैवाने जीवितहानी टळली

 

 

Mumbai :मुंबईतील माटुंगा परिसरात मध्य रेल्वेच्या महत्त्वाच्या वर्कशॉपमध्ये उभ्या असलेल्या लांबपल्ल्याच्या ट्रेनच्या डब्यांना मंगळवारी दुपारी अचानक आग लागल्याने परिसरात मोठी घबराट पसरली. काही वेळातच अग्निशमन दलाने आगीवर नियंत्रण मिळवले असून, सुदैवाने या घटनेत कोणतीही जीवितहानी झालेली नाही.

माटुंगा रेल्वे स्टेशनजवळ असलेल्या मध्य रेल्वेच्या कोच रिपेअर वर्कशॉपमध्ये ही घटना घडली. या ठिकाणी रेल्वेच्या डब्यांची दुरुस्ती आणि देखभाल केली जाते. प्राथमिक माहितीनुसार, वर्कशॉपच्या आवारात उभ्या असलेल्या एसी कोचमध्ये उपकरणांमध्ये बिघाड झाल्याने आग लागल्याचा अंदाज व्यक्त केला जात आहे.

आगीच्या ज्वाला वेगाने पसरल्याने आणि मोठ्या प्रमाणात धूर निघाल्याने संपूर्ण परिसरात भीतीचे वातावरण निर्माण झाले. घटनेची माहिती मिळताच रेल्वे प्रशासनाने तातडीने अग्निशमन दलाला पाचारण केले. मुंबई अग्निशमन दलाच्या अनेक गाड्या घटनास्थळी दाखल झाल्या आणि शर्थीच्या प्रयत्नांनंतर आगीवर नियंत्रण मिळवण्यात यश आले.

आग इतर डब्यांपर्यंत पसरू नये यासाठी तात्काळ सुरक्षा उपाययोजना करण्यात आल्या. तसेच खबरदारीचा उपाय म्हणून वर्कशॉप परिसर रिकामा करण्यात आला. वैद्यकीय पथकही घटनास्थळी तैनात करण्यात आले होते.

या घटनेचा लोकल रेल्वे सेवांवर कोणताही परिणाम झालेला नाही. मात्र, धुराचे लोट दूरवर दिसत असल्याने माटुंगा स्थानक परिसरात काही काळ भीतीचे वातावरण होते.

याआधीही मध्य रेल्वेच्या कुर्ला स्थानकातील यार्डात उभ्या असलेल्या कचरा वाहतूक करणाऱ्या लोकल ट्रेनच्या डब्यांना आग लागल्याची घटना घडली होती. गेल्या काही काळात अशा प्रकारच्या घटनांची पुनरावृत्ती होत असल्याने रेल्वे प्रशासनाच्या निष्काळजीपणाबाबत प्रश्न उपस्थित केले जात आहेत.