Pune : प्रेमासाठी इंदोरहून पुण्यात आलेली महिला हॉटेलमध्ये राहिली, परंतु अनुभव वेगळा; तरुणाविरुद्ध गुन्हा दाखल

Pune : ऑनलाईन मॅट्रिमोनियल साइटवर निर्माण झालेल्या ओळखीचे किती धोकादायक वळण घेऊ शकते, याचे धक्कादायक उदाहरण पुण्यात समोर आले आहे. हडपसर परिसरात ४२ वर्षीय महिला, जिला इंदोरहून पुण्यात प्रेमात पडल्याच्या बहाण्याने आणले गेले, फसवणुकीचा शिकार झाली आहे. आरोपी प्रशांत प्रकाश चव्हाण (वय ४२, रा. फुरसुंगी, पुणे) याच्याविरोधात गुन्हा नोंदवला गेला असून, तो सध्या फरार आहे. पोलिसांकडून त्याचा शोध वेगाने सुरू आहे.

पोलिसांच्या माहितीनुसार, पीडित महिलेची ओळख मॅट्रिमोनियल साइटवरून आरोपीशी झाली होती. सुरुवातीला गोड बोलणे, काळजी घेण्याचा भास देणे आणि भविष्याबाबत मोठमोठी स्वप्नं दाखवून आरोपीने महिलेचा विश्वास संपादन केला. “आपण लग्न करू” असे ठाम आश्वासन देत त्याने तिला पुण्यात येण्यास प्रवृत्त केले.

आरोपीने महिलेला नोकरीचे आश्वासन दिले आणि इंदोरमधील तिचा जॉब सोडून ती पुण्यात आली. येथे चव्हाणने तिला स्वतःच्या हॉटेलमध्ये कामाला लावले आणि त्याच हॉटेलमध्ये राहण्याची सोय केली. चार ते पाच महिने महिलेने तिथे राहून काम केले. या दरम्यान, अनेकदा तिच्या इच्छेविरुद्ध आरोपीने शारीरिक संबंध प्रस्थापित केले. आरोपीने लग्नाचे आमिष दाखवत तिला मानसिक दबावाखाली ठेवले आणि गैरफायदा घेतल्याचे तक्रारीत नमूद आहे.

हॉटेलमध्ये काम करत असताना पगाराच्या मुद्यावरून वाद झाला. तरीही आरोपी वेळोवेळी “लग्न करू” असे आश्वासन देत राहिला. काही दिवसांपूर्वी त्याने अचानक लग्नास नकार दिला आणि महिलेपासून दूर राहू लागला. तेव्हा पीडितेला आपली फसवणूक झाल्याचे लक्षात आले. मानसिक धक्क्यात आलेल्या महिलेने अखेर हडपसर पोलिस ठाण्यात तक्रार दाखल केली. पोलिसांनी आरोपीविरुद्ध गुन्हा नोंदवला असून लवकरच त्याला अटक होईल, असा विश्वास व्यक्त केला आहे.

या घटनेमुळे ऑनलाईन मॅट्रिमोनियल साइट्सवरील फसवणुकीचे वाढते प्रमाण पुन्हा एकदा समोर आले आहे. अनोळखी व्यक्तींवर लगेच विश्वास ठेवू नये, वैयक्तिक माहिती देताना सावधगिरी बाळगावी आणि संशयास्पद हालचाली आढळल्यास तत्काळ पोलिसांशी संपर्क साधावा, असे आवाहन पोलिसांनी केले आहे.