पुणे: म्हाळुंगे-नांदे रोडवर मोठा अपघात! चालकाला डुलकी लागल्याने कर्नाटक पासिंगचा आरएमसी ट्रक उलटला; रस्त्यांच्या दुरवस्थेमुळे नागरिकांमध्ये तीव्र संताप

पुणे: म्हाळुंगे-नांदे रोडवरील व्हीटीपी टाऊन स्क्वेअरजवळ शुक्रवारी (दि. २) सकाळी साडेसहा वाजण्याच्या सुमारास कर्नाटकहून माल घेऊन आलेला १६ टायरचा आरएमसी ट्रक रस्त्याच्या मध्यभागातील दुभाजकावर चढून पलटी झाला. चालकाला डुलकी लागल्याने वाहनावरील नियंत्रण सुटल्याची प्राथमिक माहिती आहे. सुदैवाने या अपघातात कोणतीही जीवितहानी झाली नाही.

अपघातस्थळी रस्त्याच्या एका बाजूला मोठा खड्डा असून, मध्यभागातील दुभाजक तुटलेल्या अवस्थेत आहे. विशेष म्हणजे, रात्री तसेच पहाटेच्या कमी प्रकाशात वाहनचालकांना दुभाजक स्पष्टपणे दिसावा, यासाठी पुरेसे रिफ्लेक्टिव्ह मार्किंग, रंगकाम किंवा सुरक्षा चिन्हे नसल्याचे दिसून येते. येथील एका बाजूला खड्डा, दुसऱ्या बाजूला तुटलेला दुभाजक आणि त्यावर रात्री दिसतील अशी प्रभावी मार्किंग नाही.

यामुळे मार्गावर अवजड वाहनांसह दुचाकी, कार तसेच स्कूल बसमधून प्रवास करणाऱ्या नागरिकांच्या सुरक्षिततेचा प्रश्न निर्माण झाला आहे. साहजिकच या अपघातामुळे म्हाळुंगे-नांदे मार्गावरील रस्त्याची दुरवस्था आणि अपुऱ्या सुरक्षा उपायांचा प्रश्न पुन्हा ऐरणीवर आला आहे.

रस्त्यांच्या दुरवस्थेवर आणि सुरक्षिततेवर गंभीर प्रश्नचिन्ह: या अपघातामुळे स्थानिक नागरिक आणि वाहनचालकांमध्ये तीव्र संताप उसळला आहे. हा अपघात केवळ चालकाच्या चुकीमुळेच नव्हे, तर संबंधित प्रशासनाच्या अनास्थेमुळे आणि रस्त्यांच्या अत्यंत वाईट स्थितीमुळे झाल्याचा आरोप नागरिकांनी केला आहे. घटनास्थळाची पाहणी केली असता, म्हाळुंगे-नांदे रस्त्यावर अनेक ठिकाणी मोठे आणि जीवघेणे खड्डे पडल्याचे दिसून आले आहे. याशिवाय, रस्त्याच्या दुभाजकांची (Medians) दुरवस्था झाली असून ते पूर्णपणे तुटले आहेत. रात्रीच्या वेळी किंवा धुक्याच्या वातावरणात वाहन चालवताना सुरक्षिततेसाठी आवश्यक असणारे कोणतेही 'रिफ्लेक्टीव्ह मार्किंग्ज' (Reflective Markings) किंवा दिशादर्शक फलक या रस्त्यावर उपलब्ध नाहीत. प्रशासनाच्या या ढिसाळ कारभारामुळे या मार्गावरून प्रवास करणे नागरिकांसाठी जीवघेणे ठरत आहे.

स्थानिक नागरिकांनी आणि सामाजिक कार्यकर्त्यांनी या प्रकरणाची गंभीर दखल घेत प्रशासनाकडे तातडीने रस्ते दुरुस्तीची आणि जड वाहनांच्या वेगावर नियंत्रण आणण्याची मागणी केली आहे. तसेच या मार्गावर रात्रीच्या वेळी होणाऱ्या वाहतुकीवर पोलिसांची कडक गस्त असावी, जेणेकरून अशा अपघातांना आळा घालता येईल, अशी आक्रमक भूमिका नागरिकांनी घेतली आहे. प्रशासनाने वेळीच योग्य पावले न उचलल्यास तीव्र आंदोलनाचा इशाराही देण्यात आला आहे.