सतेज पाटलांना मोठा राजकीय बूस्ट! गोकुळचे माजी संचालक किसन चौगले 'समविचारी आघाडीत' दाखल, राधानगरी तालुक्यात राजकीय समीकरणे बदलणार

कोल्हापूर/राधानगरी: कोल्हापूर जिल्हा सहकारी दूध उत्पादक संघाच्या (गोकुळ) आगामी निवडणुकीच्या पार्श्वभूमीवर राजकीय घडामोडींना कमालीचा वेग आला आहे. यातच काँग्रेसचे विधान परिषदेचे गट नेते तथा आमदार सतेज पाटील यांच्या गोटात एक अत्यंत महत्त्वाची राजकीय घडामोड घडली आहे. गोकुळ दूध संघाचे माजी संचालक किसन चौगले यांनी राष्ट्रवादी काँग्रेस पक्षाच्या (अजित पवार गट) काही प्रमुख पदाधिकाऱ्यांसह व कार्यकर्त्यांसोबत आमदार सतेज पाटील यांच्या नेतृत्वाखालील 'राजर्षी शाहू शेतकरी समविचारी आघाडी'ला जाहीर पाठिंबा देत अधिकृत प्रवेश केला आहे. या प्रवेशामुळे महायुतीला, विशेषतः मंत्री हसन मुश्रीफ यांच्या गटाला मोठा धक्का बसल्याचे मानले जात आहे.

गोकुळ दूध संघाची निवडणूक जसजशी जवळ येत आहे, तसतशी कोल्हापूर जिल्ह्यातील राजकीय वातावरण तापू लागले आहे. अशा स्थितीत राधानगरी तालुक्यात पारंपारिक राजकीय समीकरणांना खिंडार पाडत किसन चौगले यांनी समविचारी आघाडीची हातमिळवणी केली आहे. या पक्षप्रवेशानंतर आमदार सतेज पाटील यांनी गोकुळच्या आगामी निवडणुकीसाठी किसन चौगले यांच्या उमेदवारीची घोषणा देखील केली आहे. यामुळे राधानगरी तालुक्यातील सहकार व राजकीय क्षेत्राचे संपूर्ण समीकरणच बदलण्याची दाट शक्यता निर्माण झाली आहे.

या राजकीय घडामोडीमुळे एका बाजूला सतेज पाटील यांच्या नेतृत्त्वाखालील समविचारी आघाडीचे स्थानिक पातळीवर पारडे जड झाल्याचे दिसून येत आहे, तर दुसरीकडे विरोधकांच्या गोटात चिंतेचे वातावरण पसरले आहे. गोकुळ निवडणुकीच्या रणधुमाळीत हा प्रवेश एक गेमचेंजर ठरू शकतो, कारण किसन चौगले यांच्या सोबत जोडलेल्या कार्यकर्त्यांचे जाळे आणि त्यांचा दांडगा जनसंपर्क निवडणुकीत मोठा प्रभाव पाडणारा ठरेल यात शंका नाही.