Tamhini Ghat : पुण्याहून महाबळेश्वरला जाताना पैशांवरून वाद; ताम्हिणी घाटात रक्तरंजित थरार, कारमध्येच सोलापूरच्या मित्राची हत्या

Raigad : पुण्याहून महाबळेश्वरला फिरण्यासाठी निघालेल्या तरुणाचा मित्रांकडूनच निर्घृण हत्या करून मृतदेह सणसवाडी गावाच्या हद्दीत टाकून दिल्याची थरारक घटना उघडकीस आली असून, ताम्हणी घाट परिसरात खळबळ उडाली आहे. पैशाच्या वादातून घडलेल्या या रक्तरंजित घटनेचा माणगांव पोलिसांनी अवघ्या सहा ते आठ तासांत छडा लावत दोन आरोपींना अटक केली आहे.

तरुणाची धारदार शस्त्राने हत्या
माणगांव पोलीस ठाण्यात गुन्हा रजिस्टर क्रमांक 18/2026 भा.न्या.संहिता 2023चे कलम 103(1) अन्वये हा गुन्हा दाखल करण्यात आला होता. दि. 11 जानेवारी 2026 रोजी रात्री साडेअकराच्या सुमारास सणसवाडी गावच्या हद्दीतील सिक्रेट पॉईंट परिसरात एका 25 ते 30 वयोगटातील तरुणाची धारदार शस्त्राने हत्या झाल्याची माहिती पोलिसांना मिळाली होती. सुरुवातीला मृतकाची ओळख न पटल्याने ही अज्ञात हत्या पोलिसांसमोर मोठं आव्हान ठरलं होतं. घटनास्थळी पोलीस अधिकारी व तपास पथकाने तात्काळ भेट देऊन पंचनामा केला. रायगड जिल्ह्यातील सर्व पोलीस ठाणे तसेच पुणे शहर व पुणे ग्रामीण पोलीस कंट्रोल रूमकडे मिसिंग व्यक्तींबाबत माहिती मागवण्यात आली. गुप्त बातमीदार, तांत्रिक विश्लेषण, सीसीटीव्ही फुटेज आणि मोबाईल लोकेशनच्या आधारे पोलिसांनी तपासाची चक्रे वेगाने फिरवली.

BMC Election 2026 : निवडणुकांचा क्रिकेटवर परिणाम; दोन सामने ‘क्राउडलेस’ होणार, स्टेडियम राहणार रिकामे

कारमध्येच गळा आवळून संपवलं
तपासात मृतकाची ओळख आदित्य गणेश भगत (वय 22, रा. साई रेसिडेन्सी, इंद्रायणी नगर, भोसरी) (मूळ रा. चोवे पिंपरी, ता. माढा, जि. सोलापूर) अशी निष्पन्न झाली. पुढील तपासात ही हत्या त्याच्यासोबत प्रवास करणाऱ्या मित्रांनीच केल्याचं उघड झालं. पोलीस तपासात समोर आलेल्या माहितीनुसार, आदित्य भगत, अनिकेत महेश वाघमारे, तुषार उर्फ सोन्या शरद पोटोळे आणि प्रज्वल उर्फ सोन्या संतोष हंबीर हे चौघे इनोव्हा क्रिस्टा MH12 XM/9448 या वाहनातून पुण्याहून ताम्हणी घाट मार्गे महाबळेश्वरला फिरण्यासाठी निघाले होते. प्रवासादरम्यान पैशांच्या वादातून गाडीतच वाद विकोपाला गेला.

या वादातून आरोपींनी आदित्यचा इनोव्हा कारमध्येच दोरीने गळा आवळला. त्यानंतर सणसवाडी गावच्या हद्दीत सिक्रेट पॉईंटकडे जाणाऱ्या रस्त्यालगत असलेल्या मोकळ्या जागेत नेऊन कोयत्याने त्याच्या डोक्यावर, गळ्यावर आणि हातावर वार करून त्याची निर्घृण हत्या करण्यात आली. हत्या केल्यानंतर मृतदेह तेथेच टाकून आरोपी पसार झाले.

एक आरोपी फरार

या प्रकरणात अनिकेत महेश वाघमारे (वय 26) आणि तुषार उर्फ सोन्या शरद पोटोळे (वय 24) यांना अटक करण्यात आली असून, प्रज्वल उर्फ सोन्या संतोष हंबीर हा आरोपी फरार आहे. त्याचा शोध घेण्यासाठी विशेष पथक नेमण्यात आलं आहे. फिरण्यासाठी निघालेल्या तरुणाचा मित्रांकडूनच झालेल्या या हत्येमुळे परिसरात भीतीचं वातावरण पसरलं असून माणगांव पोलिसांच्या जलद तपासाची सर्वत्र चर्चा होत आहे. दरम्यान, या गुन्ह्याचा पुढील तपास सुरू आहे.