Nagpur : नागपुरात DRI ची मोठी कारवाई; शॅम्पूच्या दोन बाटल्यांत सापडले 50 कॅप्सूल, किंमत तब्बल ₹4.26 कोटी

Nagpur : नागपूरमध्ये अंमली पदार्थ तस्करीचा धक्कादायक प्रकार उघडकीस आला असून तस्करांनी शॅम्पूच्या साध्या बाटल्यांचा वापर करून कोकेन लपवण्याची क्लृप्ती वापरल्याचे समोर आले आहे. महसूल गुप्तचर संचालनालयाच्या (DRI) नागपूर युनिटने केलेल्या कारवाईत तब्बल ₹4 कोटी 26 लाख किमतीचे 853 ग्रॅम कोकेन जप्त करण्यात आले असून एका महिलेला अटक करण्यात आली आहे.

गोपनीय माहितीनुसार, हजरत निजामुद्दीन–केएसआर बेंगळुरू राजधानी एक्सप्रेसमधून एक महिला दिल्लीहून बेंगळुरूकडे कोकेनची तस्करी करत असल्याची माहिती DRI अधिकाऱ्यांना मिळाली होती. त्यानुसार नागपूर रेल्वे स्थानकावर सापळा रचण्यात आला. गाडी आल्यानंतर संशयित महिलेवर लक्ष ठेवण्यात आले आणि पुढे अजनी स्थानकावर तिला ताब्यात घेऊन चौकशी करण्यात आली.

सुरुवातीच्या तपासात तिच्याकडे कोणतेही संशयास्पद साहित्य आढळले नाही. मात्र तिच्या सामानातील दोन शॅम्पूच्या बाटल्या अधिकाऱ्यांना संशयास्पद वाटल्या. बाटल्यांतील द्रव काढून तपासणी केली असता त्यामध्ये पिवळ्या रंगाच्या 50 सीलबंद कॅप्सूल्स आढळल्या. या कॅप्सूल्समध्ये पांढऱ्या रंगाचे कोकेन कौशल्याने लपवण्यात आले होते.

फील्ड ड्रग टेस्टमध्ये हा पदार्थ कोकेन असल्याचे स्पष्ट झाले. जप्त करण्यात आलेल्या कोकेनचे एकूण वजन 853 ग्रॅम असून आंतरराष्ट्रीय बाजारात त्याची किंमत सुमारे ₹4.26 कोटी असल्याचे सांगितले जाते.

या प्रकरणी संबंधित महिलेला एनडीपीएस कायदा 1985 अंतर्गत अटक करण्यात आली असून न्यायालयाने तिला न्यायालयीन कोठडीत पाठवले आहे. या प्रकरणामागे मोठे आंतरराज्य रॅकेट सक्रिय असल्याचा संशय असून तिच्या साथीदारांचा शोध सुरू आहे. पुढील तपासात आणखी मोठे खुलासे होण्याची शक्यता आहे.