Pune : पुणे महापालिका निवडणुकीच्या तोंडावर गुंड गजा मारणे तुरुंगाबाहेर; नेमका कसा सुटला?

Pune : पुणे महापालिकेच्या निवडणुकीत मतदानाचा हक्क बजावण्यासाठी महाराष्ट्र संघटित गुन्हेगारी नियंत्रण कायद्यानुसार (मकोका) गुन्ह्यात आरोपी गजानन मारणेला गुरुवारी आणि शुक्रवारी पुण्यात येण्यास उच्च न्यायालयाने परवानगी दिली आहे.

कोथरूड येथील आयटी कर्मचाऱ्याला मारहाण केल्याप्रकरणी गजानन पंढरीनाथ मारणे याच्यासह मारणे टोळीच्या दहा जणांवर 'मकोका' अन्वये गुन्हा दाखल आहे. त्या विरोधात मारणेने उच्च न्यायालयात रिट याचिका दाखल केली आहे. त्यानंतर या गुन्ह्यात मारणेला पुणे सत्र न्यायालयाने जामीन मंजूर केला. त्या वेळी मारणेने उच्च न्यायालयात दाखल केलेल्या याचिकेवरील निर्णय होईपर्यंत खटल्याच्या सुनावणीच्या तारखेशिवाय पुणे महापालिका हद्दीत प्रवेश करू नये, अशी अट न्यायालयाने घातली आहे.

Tamhini Ghat : पुण्याहून महाबळेश्वरला जाताना पैशांवरून वाद; ताम्हिणी घाटात रक्तरंजित थरार, कारमध्येच सोलापूरच्या मित्राची हत्या

गजानन मारणेची पत्नी जयश्री मारणे राष्ट्रवादी काँग्रेस पक्षाकडून निवडणूक लढवित आहे. तिच्या प्रचारासह मतदानाचा हक्क बजावण्यासाठी पुण्यात प्रवेशबंदीची अट शिथिल करण्याची विनंती मारणेने पुण्याच्या विशेष न्यायालयाकडे केली होती. मात्र, ही विनंती फेटाळण्यात आल्यानंतर गजानन मारणेने अॅड. विजयसिंह उच्च ठोंबरे यांच्यामार्फत न्यायालयात धाव घेतली. 'पत्नीला निवडणूक प्रचारासाठी मदत करण्यासाठी; तसेच मतदानाचा हक्क बजावण्यासाठी शहरात येण्याची परवानगी द्यावी. आरोपीने जामीनाच्या सर्व अटींचे पालन केले आहे,' असा युक्तिवाद अॅड. ठोंबरे यांनी केला, 'तो ग्राह्य धरून उच्च न्यायालयाने गजानन मारणेला मतदानाचा हक्क बजावण्यासाठी दोन दिवस पुण्यात येण्यास परवानगी दिली,' असे अॅड. ठोंबरे यांनी सांगितले.

मारणेच्या हालचालींवर पोलिसांचे लक्ष

गजा मारणेची पत्नी महापालिकेच्या निवडणुकीत उमेदवार आहे. मारणे याची कोथरूड भागात दहशत आहे. त्याने काहींना दूरध्वनी केल्याची माहिती पोलिसांना मिळाली. त्यानंतर गुन्हे शाखेच्या पथकाने मारणेला समज दिली होती. निवडणूक प्रक्रियेत कायदा आणि सुव्यवस्थेचा प्रश्न निर्माण झाल्यास कडक कारवाई करण्याचा इशारा पोलिस आयुक्तांनी दिला होता. मारणेच्या हालचालीवर गुन्हे शाखेने नजर ठेवली आहे. पुणे शहरातील विविध पक्षांच्या ६० उमेदवारांविरुद्ध गंभीर गुन्हे दाखल आहेत. पोलिसांनी त्यांची यादी तयार केली आहे. अशा उमेदवारांच्या हालचालीवर पोलिसांनी लक्ष ठेवले आहे.