पुणे: चारित्र्याच्या संशयावरून पत्नीचा शिरच्छेद करणाऱ्या नराधमाला जन्मठेप; जपानमधून आलेल्या साक्षीदाराची साक्ष ठरली महत्त्वाची

पुणे: पत्नीच्या चारित्र्यावर संशय घेऊन तिची कुऱ्हाडीने निर्घृण हत्या करणाऱ्या आणि तिचे तुटलेले शिर हातात घेऊन परिसरात फिरणाऱ्या रामचंद्र शेहू चव्हाण (वय ६३) याला न्यायालयाने जन्मठेपेची शिक्षा सुनावली आहे. अतिरिक्त सत्र न्यायाधीश सुमीत जोशी यांनी हा ऐतिहासिक निकाल दिला असून, आरोपीला जन्मठेपेसह ७ हजार रुपये दंडाची शिक्षा ठोठावण्यात आली आहे.

नेमकी घटना काय होती?
९ ऑक्टोबर २०१५ रोजी कात्रजमधील सुखसागरनगर परिसरात ही अंगावर काटा आणणारी घटना घडली होती. मूळचा कर्नाटकचा असलेला आणि पुण्यात सुरक्षा रक्षक म्हणून काम करणारा रामचंद्र चव्हाण याचे पत्नी सोनाबाई (वय ५५) हिच्यासोबत चारित्र्याच्या संशयावरून नेहमी भांडण होत असे. या रागातून त्याने कुऱ्हाडीने पत्नीवर हल्ला करून तिचा खून केला. एवढ्यावरच न थांबता त्याने लाकडी ओंडक्यावर पत्नीचा मृतदेह ठेवून तिचे दोन्ही हात-पाय आणि शिर धडावेगळे केले.

हातात शिर घेऊन फिरताना पकडले
पुरावा नष्ट करण्याच्या उद्देशाने आरोपी रक्ताने माखलेली कुऱ्हाड आणि पत्नीचे शिर हातात घेऊन कात्रज तलावाच्या दिशेने निघाला होता. यावेळी गस्तीवर असलेल्या पोलीस अंमलदाराने त्याला संशयास्पद स्थितीत पाहून रोखले आणि त्याच्या हातातील शिर पाहून तातडीने त्याला ताब्यात घेतले. याप्रकरणी आरोपीची सून सुनीता चव्हाण हिने भारती विद्यापीठ पोलीस ठाण्यात तक्रार दाखल केली होती.

जपानमधून येऊन नोंदवली साक्ष
या खटल्यात सरकारी वकील प्रेमकुमार अगरवाल यांनी २४ साक्षीदार तपासले. यामध्ये आरोपीची सून, शेजारी आणि एका शाळकरी मुलीची साक्ष अत्यंत महत्त्वाची ठरली.

महत्त्वाची साक्ष: शेजारी राहणाऱ्या एका व्यक्तीने ही घटना बाल्कनीतून पाहिली होती आणि त्याचे मोबाईलमध्ये चित्रणही केले होते. नोकरीनिमित्त जपानला स्थायित्त झालेल्या या साक्षीदाराने विशेषत्वाने भारतात येऊन न्यायालयात आपली साक्ष नोंदवली.
चिमुकलीची ओळख: शाळेत जाण्यासाठी घराबाहेर थांबलेल्या एका ९ वर्षांच्या मुलीनेही आरोपीला ओळखले.
न्यायबाह्य कबुली: घटनेनंतर आरोपी हातात शिर घेऊन जात असताना एका चहाविक्रेत्या महिलेने त्याला विचारले की, 'अण्णा, कुठे बकरू कापले?'. त्यावर त्याने थंडपणे 'बायकोला मारले' अशी कबुली दिली होती, जी न्यायालयात सिद्ध झाली.
न्यायालयाने आरोपीचा क्रूरपणा आणि उपलब्ध पुरावे ग्राह्य धरून त्याला मरेपर्यंत जन्मठेपेची शिक्षा सुनावली आहे. या निकालामुळे परिसरात पुन्हा एकदा या जुन्या घटनेची चर्चा सुरू झाली आहे.