दार उघड बये' हाक पुन्हा घुमणार! लाडके आदेश बांदेकर 'होम मिनिस्टर'च्या नव्या सीझनसह छोट्या पडद्यावर परतणार?

मराठी टेलिव्हिजन विश्वात तब्बल २० वर्षे प्रेक्षकांच्या मनावर अधिराज्य गाजवणारा आणि घराघरात लोकप्रिय असलेला '' हा कार्यक्रम पुन्हा एकदा प्रेक्षकांच्या भेटीला येण्याची शक्यता निर्माण झाली आहे.
महाराष्ट्राचे लाडके 'भावोजी' अर्थात आदेश बांदेकर पुन्हा एकदा या शोच्या माध्यमातून छोट्या पडद्यावर पुनरागमन करणार असल्याच्या चर्चेने सध्या मनोरंजन विश्वात जोर धरला आहे.२००४ मध्ये सुरू झालेला 'होम मिनिस्टर' हा रिॲलिटी शो अत्यंत लोकप्रिय ठरला होता.

साधारण ६,५०० हून अधिक भागांचा टप्पा पार केल्यानंतर २०२४ मध्ये या कार्यक्रमाने प्रेक्षकांचा निरोप घेतला होता. मात्र, नुकत्याच पार पडलेल्या एका आंबा महोत्सवादरम्यान वाहिनीच्या प्रोग्रामिंग हेड कल्याणी पाठारे यांनी आगामी कार्यक्रमांचे संकेत देताना, "दार उघड बये म्हणत भावोजी येणार की आणखी कोणी?" असे सूचक विधान केले. त्यांच्या या विधानामुळे 'होम मिनिस्टर'चा नवा सीझन लवकरच सुरू होणार असल्याच्या चर्चांना उधाण आले आहे.मिळालेल्या माहितीनुसार, या नव्या सीझनमध्ये प्रेक्षकांना जुन्या 'होम मिनिस्टर'ची आठवण करून देणारी सहज, साधी आणि घराघरांमध्ये आपलेपणा निर्माण करणारी शैली पाहायला मिळू शकते. मूळचा केवळ दोन आठवड्यांसाठी नियोजित असलेला हा शो महिला प्रेक्षकांच्या उदंड प्रतिसादामुळे सलग दोन दशके सुरू राहिला होता. प्रत्येक भागाच्या शेवटी विजेत्या माऊलीला मिळणारी 'पैठणी' आणि भावोजींचा संवाद हे या शोचे मुख्य वैशिष्ट्य होते.या कार्यक्रमाच्या संदर्भात प्रेक्षकांचे लाडके आदेश बांदेकर यांचेच नाव आघाडीवर असले, तरी अद्याप वाहिनीकडून किंवा बांदेकर यांच्याकडून अधिकृतपणे कोणतीही घोषणा करण्यात आलेली नाही. मात्र, 'दार उघड बये दार उघड' ही प्रसिद्ध हाक पुन्हा ऐकण्यासाठी महाराष्ट्रातील तमाम गृहिणी आणि प्रेक्षक आता अत्यंत उत्सुक आहेत.