Hinjawadi Traffic : हिंजवडी, मुळशीच्या वाहतूक कोंडीची कटकट संपणार, PMRDA नं आखला प्लान, ३ रोड कसे असतील?

Mulshi-Hinjawadi smart road infrastructure : आयटी हब असलेले हिंजवडी आणि मुळशीमध्ये भयंकर वाहतूक कोंडी होते. गेल्या काही दिवसांपासून तर वाहतूक कोंडीने उच्चांक गाठला आहे, ही पुणे शहरातील एक गंभीर समस्या झाली. हिंजवडी आयटी पार्कमुळे या भागात वाहनांची संख्या प्रचंड वाढली आहे. त्यात रस्ते हवे तसे नाहीत, मेट्रोची कामे सुरू आहेत, याचा परिणाम वाहतुकीवर होतोय. पण आता ही कटकट संपणार आहे. पुढील काही महिन्यात हिंजवडीमध्ये मेट्रो तर सुरू होणारच आहे. पण PMRDA ने मुळशी आणि हिंजवडीच्या वाहतूक कोंडी सोडवण्यासाठी नवा मार्ग काढला आहे.

पुण्यातील सर्वात वेगाने वाढणाऱ्या या औद्योगिक आणि आयटी कॉरिडॉरमधील वाहतूक कोंडीचा त्रास अनेकांना होतोय. येथील रस्ते पायाभूत सुविधा सुधारण्यासाठी पुणे महानगर प्रदेश विकास प्राधिकरण (PMRDA) ने मोठं पाऊल उचलले आहे. हिंजवडी आयटी पार्क आणि मुळशी तालुक्यातील MIDC परिसरात तीन महत्त्वाच्या रस्ते प्रकल्पांचा विकास सुरू करण्यात आला आहे. या नव्या रस्त्यांमुळे वाहतूक कोंडीची कटकट कायमची संपणार आहे. हे रस्ते कोणते आहेत? कोणत्या भागातील वाहतूक सुरळीत होणार? याबाबत सविस्तर जाणून घेऊयात...
PMRDA कोणते तीन रस्ते बांधणार?
म्हाळुंगे ते हिंजवडी फेज १

रोडची लांबी : 1.50 किमी

रुंदी: 36 मीटर

अंदाजित खर्च: 13.05 कोटी रुपये

ठाकर वस्ती ते माण गावठाण

रोडची लांबी: 2.40 किमी

अंदाजित खर्च: 20.88 कोटी रुपये

सूर्या हॉस्पिटल ते ठाकर वस्ती

रोडची लांबी : 3.50 किमी

अंदाजित खर्च : 30.45 कोटी रुपये

वरील तिन्ही प्रकल्पासाठी भूसंपादन प्रक्रिया सुरू करण्यात आली आहे. रस्ते संपर्क सुधारण्यासाठी, वाहतूक कोंडी कमी करण्यासाठी आणि व्यावसायिक तसेच स्थानिकांचा प्रवास सुरक्षित आणि वेगवान होण्यासाठी तिन्ही रस्ते डिझाइन केले आहेत, असे पीएमआरडीए अधिकाऱ्याने सांगितले.

हिंजवडी आणि मुळशी परिसरातील वाहतूक कोंडीमुळे स्थानिक नागरिक आणि आयटी कर्मचारी त्रस्त आहेत. १० मिनिटांच्या प्रवासासाठी तब्बल एख तासांचा वेळ लागतो. दररोजच्या वाहतूक कोंडीमुळे सर्वजण वैतागले आहेत. PMRDA कडून यावर तोडगा काढण्यासाठी तीन नवे रस्ते तयार करण्याचा निर्णय घेतला आहे. तसेच, मेट्रो सुरू झाल्यास दीर्घकालीन दिलासा मिळू शकतो. तिन्ही रस्ते पूर्ण झाल्यावर वाहतूक कोंडीची कटकट संपणार आहेच. प्रवासाचा वेळही वाचणार आहे.